Usı jıldıń 14-16-noyabr kúnlerinde Ózbekstan Respublikası Joqarı bilimlendiriw, ilim hám innovaciyalar ministrligi tárepinen mámlekette innovaciyalıq infradúzilmeni jáne de jetilistiriw, isbilermenlik hám investiciyalıq ortalıqtırawajlandırıw ushın qolay sharayatlar jaratıw maqsetinde birqatar ministrlik hám shólkemler menen birge islesiwde “InnoWeek.uz-2024” xalıqaralıq innovaciyalıq ideyalar hápteligi ótkerilmekte.

Háptelik sheńberinde ótkerilip atırǵan kórgizbelerge Ilimiy isler hám innovaciyalar boyınsha prorektorı I.Turdimambetov basshılıǵındaǵı universitet delegaciyası ózleriniń ilimiy innovaciyalıq islenbeleri menen belsendi qatnaspaqta. Ilimiy isler hám innovaciyalar boyınsha prorektorı I.Turdimambetov búgin respublikadaǵı joqarı oqıw orınları Ilimiy isler hám innovaciyalar boyınsha prorektorı hámde ilimiy shólkemlerdiń basshıları orınbasarlarınıń qatnasıwında ótkerilgen “Ilimiy hám innovaciyalıq xızmet boyınsha úshinshi xalıqaralıq forum”da qatnastı. Bunda ilimiy izertlewler, innovaciyalar hám olardıń nátiyjelerin ámeliyatqa engiziw, bul tarawdaǵı birge islesiwler boyınsha pikirler almasıldı.

Bunnan tısqarı, universitet student jasları “InnoWeek.uz-2024” xalıqaralıq innovaciyalıq ideyalar hápteligi sheńberinde ótkerilip atırǵan “R:ED FEST” robototexnika tańlawında usı tarawǵa baylanıslı ózleriniń innovaciyalıq islenbeleri menen qatnaspaqta.