Búgin 21-noyabr kúni Berdaq atındaǵı Qaraqalpaq mámleketlik universiteti Májilisler zalında Ózbekstan Respublikası Joqarı bilimlendiriw, ilim hám innovaciyalar ministrliginiń 2024-jıl 20-marttaǵı 76-sanlı buyrıǵı menen tastıyqlanǵan «Túslik Aralboyı tábiyiy resurslarınan únemli paydalanıw» atamasındaǵı XI respublikalıq ilimiy-ámeliy konferenciyası bolıp ótti. Konferenciyaǵa Ózbekstan Respublikası Joqarı oqıw orınlarınan professor-oqıtıwshılar hám student-jaslar qatnastı. Konferenciyanı Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdımambetov ashıp berdi hám basqarıp bardı. Konferenciyada Túslik Aralboyı tábiyiy resurslarınıń házirgi jaǵdayı, olardı qorǵaw hám aqılǵa muwapıq paydalanıw tarawında islenip atırǵan jumıslar hár tárepleme dodalandı. Sonday-aq, tábiyiy resurslardı aqılǵa muwapıq paydalanıwdı elede jetilistiriw boyınsha usınıslar berildi. Konferenciya Biologiya fakultetinde sekciyalarda dawam etip bayanatshılar biologiyalıq resurslardan aqılǵa muwapıq paydalanıw boyınsha bayanatlar jasadı.

Konferenciyanıń tiykarǵı maqseti Ózbekstan Respublikasında alıp barılıp atırǵan ekologiyalıq hám biologiyalıq izertlewler nátiyjelerin, aktual máselelerin hám jańa perspektivaların dodalaw, pánler aralıq integraciyaǵa tiykarlanıp, bioekologiyalıq izertlewler tarawı boyınsha tájiriybe almasıw, aymaqlarda ekologiyalıq mashqalalardı saplastırıwǵa qaratılǵan ilimiy hám ámeliy usınıslardı islep shıǵıwdan ibarat.

Usı konferenciya joqarı oqıw orınlarınıń ilimiy potencialın bekkemlew, tábiyattı qorǵaw tarawında birge islesiwdi jolǵa qoyıw, ilimiy-izertlew jumısların jedellestiriw, ilim hám islep shıǵarıw integraciyasın kúsheytiw, professor-oqıtıwshılar ilimiy jumıslarınıń nátiyjeliligin asırıw, sonıń menen birge, ziyrek studentler, magistrantlar hám doktorantlardıń ilimiy-izertlew jumıslarına baǵdar beriwde ayrıqsha áhmiyetke iye.