Ózbekstan Respublikası Prezidentiniń 2023-jıl 11 sentyabr kúngi PP-158-san pármanına tiykar “Ózbekstan – 2030” strategiyası tastıyqlandı. Bul hújjet keleshekte Ózbekstannıń tiykarǵı rawajlanıw baǵdarların belgilep beriwshi áhmiyetli hújjet esaplanıp, bes tiykarǵı baǵdar sheńberinde júz maqsetke erisiwge qaratılǵan. Bul hújjettiń maqsetleri hám kórsetkishleri xalıq tárepinen jeńil qabıl etilip, túsiniw ushın qolay formada jarıtılǵan. “Ózbekstan – 2030” strategiyası mámlekettiń turaqlı hám rawajlanıwın támiynlew maqsetinde islep shıǵılǵan hám Ózbekstannıń uzaq múddetli rawajlanıw baǵdarların belgileydi. Onda túrli tarawlardaǵı reformalar, ekonomikalıq ósiw, bilimlendiriw, medicina hám sociallıq qorǵaw sistemalarınıń jeddellesiwi, ekologiyalıq turaqlılıqtı támiynlew hám mámleket basqarıwın zamanagóylestiriw sıyaqlı maqsetler kózde tutılǵan.
Sonday-aq, Strategiya mámleketimiz puqaralarınıń erkin hám abadan, qúdretli Jańa Ózbekstandı qurıw boyınsha erk-ıqrarın júzege shıǵarıw, hár bir puqaraǵa óz potencialın rawajlandırıw ushın barlıq imkaniyatlardı jaratıw, bilimli hám ruwxıy barkamal áwladtı tárbiyalaw, kúshli ekonomikanı qáliplestiriw, ádalat, nızam ústinligi, qáwipsizlik hám turaqlılıqtı támiynlew maqsetlerine xızmet etedi. Prezidentimiz Sh.M.Mirziyoyevtiń bul pármanı menen “Ózbekstan – 2030” strategiyasın ámelge asırıw hám onıń maqsetli kórsetkishlerine erisiw barlıq mámleketlik uyımları hám shólkemleri iskerliginde tiykarǵı wazıypa etip belgilengen.
Nókis rayonlararalıq hákimshilik
sudınıń sudyası, yu.i.d., docent K.R.Babanazarov.
