Búgin 29-noyabr kúni Berdaq atındaǵı Qaraqalpaq mámleketlik universitetiniń akademik Ch.Abdirov atındaǵı mádeniyat sarayında Nókis qalasındaǵı barlıq joqarı oqıw orınlarınıń juwapkerleri qatnasıwında májilis bolıp ótti. Onda Qaraqalpaqstan Respublikası Ishki isler ministri, polkovnik B.Tórebekov, Qaraqalpaqstan Respublikası Ayrıqsha jaǵdaylar basqarması baslıǵı podpolkovnik A.Davletov, Qaraqalpaqstan Respublikası joqarı bilimlendiriw, ilim hám innovaciyalar ministri B.Qayıpbergenovlar qatnastı. Ilajdı Qaraqalpaqstan Respublikası Ministrler Keńesi baslıǵınıń orınbasarı B.Ótemuratov alıp bardı.

Ilajda gúz-qıs máwsiminde gaz iyisinen záhárleniwdiń aldın alıw máseleleri kórip shıǵıldı hám bul baǵdarda úgit-násiyatlaw jumısların shólkemlestiriw áhmiyetli ekenligi aytıp ótti. Májiliste gúz-qıs máwsiminde qáwipsizlik ilajların kúsheytiw boyınsha usınıslar berilip, gaz plitaları hám ısıtıw sistemalarınan durıs paydalanıw, gaz qurılmaların turaqlı texnikalıq tekseriwden ótkeriw zárúr ekenligin atap ótildi.

Ilaj dawamında kóplegen aymaqlarda baqlanıp atırǵan gaz iyisinen záhárleniw jaǵdayları boyınsha tayarlanǵan arnawlı slaydlar jıynalǵanlar názerine usınıldı. Ushırasıw juwmaǵında joqarı oqıw orınlarınıń juwapkerleri menen óz-ara pikir alısıp, student-jaslar tárbiyasın jáne de nátiyjeli shólkemlestiriw hám olardı hár qıylı qáwip-qáterlerden qorǵaw boyınsha birgelikte islewge kelisip alındı.

QMU baspasóz xızmeti