1-dekabr – Jer júzilik AIJSqa qarsı gúresiw múnásibeti menen student-jaslar arasında salamat turmıs tárizin qáliplestiriw, oǵan qarsı gúresiw hám de olar arasında profilaktikalıq úgit-násiyatlaw jumısların alıp barıw maqsetinde taraw qánigeleri menen birgelikte «AIJS – ájel elshisi» atamasında úgit-násiyatlaw ilajı ótkerildi. Ilajǵa Dene mádeniyatı fakulteti dekanı N.Kaypov, jaslar menen islesiw boyınsha dekan orınbasarı R.Óteniyazov, Respublikalıq qánigelestirilgen narkologiya dispanseri shıpakerleri A.Jumabaev, Q.Atamuratovlar, tyutorlar hám de student-jaslar qatnastı.
Ilajda taraw qánigeleri tárepinen AIJS keselliginiń payda bolıw tariyxı, onıń juǵıw jolları, rawajlanıw dáwirleri, zıyanlı, ayanıshlı hám awır aqıbetleri, dúnya boylap hám respublikamızda AIJS keselligi menen awırǵan qansha puqaralar esapta turatuǵınlıǵı, bul illetten qorǵanıw jolları, jeke gigiena, bul kesellike qarsı bárshe jaslar birgelikte gúresiwleri lazım ekenligi, sonday-aq, keselliktiń aldın alıw maqsetinde Respublika jasları salamatlıǵın kúsheytiw, bárkamal insan etip tárbiyalawǵa qaratılǵan ilajlar hám hár túrli sport túrlerinen jarıslar ótkeriliwin, jaslardıń sport sekciyalarına bekitiliwin, olardıń bos waqıtların mazmunlı shólkemlestiriw haqqında ayrıqsha atap ótildi.
Ilaj dawamında AIJSqa qarsı gúresiw boyınsha úgit-násiyatlaw quralları yaǵnıy, buklet hám plakatlar tarqatıldı. Ótkerilgen ilajdıń tiykarǵı maqseti jaslar arasında AIJS keselligine qarsı gúresiw hám aldın alıw, bul jaman illet boyınsha keńnen úgit-násiyat jumısların alıp barıw, sonıń menen birge jaslarımızdı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
