Prezidentimiz Shavkat Mirziyoyev Oliy Majilis Nızamshılıq palatasınıń májilisinde uzaq múddetli perspektivaǵa arnalǵan áhmiyetli wazıypalardı járiyalaǵannan keyin, 2025-jıldı “Qorshaǵan ortalıqtı asıraw hám jasıl ekonomika” jılı dep belgilewdi usınıs etti. Bul jáne bir márte biz qánigeler ushın ana tábiyatımızdı asırap-abaylaw en áhmiyetli wazıypa ekenligin kórsetedi.

Berdaq atındaǵı Qaraqalpaq mámleketlik universitetiniń Biologiya fakulteti imaratı átirapında «Jasıl mákan» akciyası bolıp ótti. Ilajǵa Biologiya fakulteti professor-oqıtıwshıları, texnik-xızmetkerleri, tyutor hám student-jasları kewilli hám belsendi qatnastı.

Fakultet átirapı abadanlastırılıp, belgilengen orınǵa «Katalpa», «Aylant» hám «Yapon Saforası» dekorativ nálleriniń 500 túbi egildi. “Jasıl mákan” ulıwma milliy joybarı biziń hám siziń ómirimiz ushın ayrıqsha áhmiyetke iye bolıp, salamat turmıs tárizin jáne de jaqsılaw, hawanıń tazarıwına xızmet etedi. Sonlıqtan da, Janajan Watanımızdı jasıl mákanǵa aylandırıwda bárshemiz óz úlesimizdi qosayıq!