Xabarıńız bar, usı jıldıń 25-30-noyabr kúnleri Berdaq atındaǵı Qaraqalpaq mámleketlik universiteti rektorı, akademik A.Reymov hám universitettiń Ilimiy isler hám innovaciyalar boyınsha prorektorı I.Turdımambetovlar xızmet saparı menen Koreya Respublikasında boldı.
Sapar sheńberinde universitetimiz delegaciyası Koreya Respublikası ilimiy izertlew institutı (KBSI), Koreya standartlastırıw hám ilimiy-izertlew institutında (KRISS) bolıp, sonday-aq, xalıqaralıq ilimiy birge islesiwdi keńeytiw, innovaciyalıq ideyalardı qollap-quwatlaw maqsetinde shólkemlestirilgen IRIC 2024 (Xalıq aralıq R&D sanaat) ilimiy koferenciyasında qatnastı.
Sonıń menen birge, sapar dawamında universitet delegaciyası Koreyanıń aldınǵı biotexnologiya kompaniyalarınan biri esaplanǵan Bioneer venchur biotexnologiya kompaniyasında bolıp, ol jerde kompaniyanıń laboratoriyaları hám ilimiy-izertlew orayların kózden ótkerdi.
Atap aytqanda, biotexnologiya tarawında qollanılatuǵın aldınǵı texnologiyalar, zamanagóy diagnostika úskeneleri hám ilimiy qollanbalardı ámeliyatqa engiziw processleri menen jaqınnan tanıstı. Maǵlıwmat ushın; bul kompaniya biotexnologiya, genomika hám ilimiy izertlewler ushın joqarı texnologiyalıq úskeneler islep shıǵarıw boyınsha jetekshi esaplanadı.
Bioneer 1992-jılı Koreyada óziniń dáslepki qádemlerin taslaǵan birinshi venchur biotexnologiya kompaniyası bolıp, ıssılıqqa shıdamlı DNK polimeraza sıyaqlı PCRde qollanılatuǵın DNK oligonukleotidleri hám reagentleri ushın ximiyalıq sintez xızmetlerin usınadı. Bioneer ótken 30 jıl dawamında aldınǵı mámleketler dárejesinde ilimiy-izertlew hám diagnostika ortalıǵın jaratıwǵa, biotexnologiya ushın zárúr bolǵan 300 den aslam túrdegi genetikalıq injenerlik fermentleri, beloklar, reagentler hám zamanagóy ásbap-úskenelerdi sonday-aq, izertlew, molekulyar diagnostika hám dári izertlewleri hám qollanbaların jaratqan.
Bioneer venchur biotexnologiya kompaniyası dúnyadaǵı birinshi avtomatlastırılǵan sintetizatordı islep shıǵıp, ol bir waqıttıń ózinde 384 túrdegi oligonukleotidlerdi sintezleydi hám hár qıylı DNK hám RNK oligonukleotidlerin, sonıń ishinde, insan genomı siRNK kitapxanaların kommerciyalastırǵan.
QMU baspasóz xızmeti
