3-dekabr – Xalıqaralıq mayıplar kúni múnásibeti menen búgin Berdaq atındaǵı Qaraqalpaq mámleketlik universitetinde bayram ilajı bolıp ótti. Onda universitetimiz rektorı, akademik A.Reymov, universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov hám student-jaslar qatnastı.
Ushırasıwda rektor A.Reymov sózge shıǵıp, oqıw dárgayımızda mayıplıǵı bolǵan studentler ushın jaratılıp atırǵan qolaylı sharayatlar haqqında sóz etti. Ol óziniń shıǵıp sóylegen sózinde mámleketimiz tárepinen bul baǵdarda ámelge asırılıp atırǵan keń kólemli jumıslar, ásirese mayıplıǵı bolǵan jaslardıń bilim alıwı, olardıń densawlıǵın tiklew hám jámiyette óz ornın tabıwı ushın kórsetilip atırǵan itibar haqqında aytıp, olardı bayram menen qutlıqladı.
Sonday-aq, olarǵa universitet rektoratı tárepinen tayarlanǵan bayram sawǵası sıpatında qarjılay sıylıqlar hám estelik sawǵaların tapsırdı. Ilaj dawamında student-jaslar universitet rektoratı tárepinen kórsetilip atırǵan bunday itibar hám ǵamxorlıqtan sheksiz quwanıshta ekenligin aytıp, óz minnetdarshılıqların bildirdi.
Bunnan soń, rektor basshılıǵında student-jaslar menen jıl juwmaǵı hám kelesi jıl rejelerin dodalawǵa baǵıshlanǵan ashıq sáwbet bolıp ótti. Dáslep rektor 2024-jılı universitette ámelge asırılǵan tiykarǵı jumıslar, erisilgen jetiskenlikler hám sheshiliwi kerek bolǵan máseleler sonday-aq, 2025-jılı ámelge asırılıwı rejelestirilgen jumıslar haqqında tolıq maǵlıwmat berdi.
Ashıqtan-ashıq sóylesiw dawamında studentler ózlerin qızıqtırǵan sorawlar menen múrájat etti. Rektor barlıq sorawlarǵa tolıq juwap berip, hár bir studenttiń usınısı hám mashqalası esapqa alınıp, olardı sheshiw ushın zárúr ilajlar kóriletuǵının atap ótti. Sonıń menen birge, student-jaslardı óz baslamaları menen belsendi bolıwǵa hám universitette ótkeriletuǵın ilajlarda belsene qatnasıwǵa shaqırdı.
Bul ushırasıw qızǵın hám ashıq-aydın tárizinde ótkerilip, student-jaslar hám universitet basshıları arasındaǵı óz-ara isenim hám birge islesiwdi bekkemlewge xızmet etti. Ilaj universitetimiz Kórkem óner fakulteti student-jasları tárepinen tayarlanǵan koncert baǵdarlaması menen dawam etti.
Haqıyqatında da mayıplıǵı bolǵan, sociallıq qorǵawǵa mútáj puqaralardı qollap-quwatlaw, olarǵa járdem beriw sıyaqlı insanıylıq pazıyletler ázel-ázelden ruwxıy sanamızǵa sińip, ullı qádiriyatlarımızdıń birine aylanǵan.
QMU baspasóz xızmeti
