Búgin 21-dekabr kúni Berdaq atındaǵı Qaraqalpaq mámleketlik universitetinde universitet Ilimiy keńesiniń gezektegi májilisi bolıp ótti. Onda universitettiń barlıq prorektorları, bólim baslıqları, fakultet dekanları, kafedra baslıqları hám ilimiy keńes aǵzaları qatnastı. Májilisti universitet rektorı Axmed Reymov basqarıp bardı.
Dáslep májiliste ilimiy ataqlarǵa talaban universitet professor-oqıtıwshılarınıń attestaciya hújjetlerin Joqarı attestaciya komissiyasına usınıw boyınsha universitet keńesi xatkeri J.Biyimbetovtıń málimlemesi tıńlandı.
Bunnan soń, studentlerdiń STJ larına jaylasıwı, ijarada jasawshı studentlerdiń tólemlerin qaplap beriw sistemasınıń engiziliwi haqqında universitettiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinovtıń, sonday-aq, 2024-2025-oqıw jılına universitetke studentlerdi qabıllaw nátiyjeleri haqqında qabıllaw komissiyasınıń juwaplı xatkeri S.Sulaymanovtıń bayanatları tıńlandı.
Májilis dawamında universitet rektorı A.Reymov 2024-jılda ámelge asırılǵan jumıslar, sonday-aq, 2025-jılda ámelge asırılıwı kerek bolǵan tiykarǵı wazıypalar, sonıń ishinde, bilimlendiriwdiń sapasın arttırıw, ilimiy-izertlew jumısların rawajlandırıw hám scopus xalıq aralıq ilimiy hám ilimiy-texnikalıq maǵlıwmatlar bazalarınan paydalanıw, xalıqaralıq birge islesiwdi kúsheytiw máseleleri boyınsha óz pikir usınısların bildirdi.
Májilis sońında barlıq fakultet dekanları, kafedra baslıqları hám bólim baslıqlarına tapsırmalar berilip, rejelerdi ámelge asırıw boyınsha juwapkershilikli qatnas jasaw zárúr ekenligi atap ótildi.
QMU baspasóz xızmeti
