Ilim tek ǵana ekonomikalıq rawajlanıwdıń emes, al sociallıq turaqlılıqtıń da tiykarı bolıp esaplanadı. Innovaciyalar hám ilimiy ashılıwlar jámiyetti jańa shoqqılarǵa alıp shıǵadı, áhmiyetli mashqalalardı sheshiwde nátiyjeli qural boladı. Sol sebepli, búgingi kúnde ilimdi rawajlandırıw, jaslardı usı taraw menen shuǵıllanıwǵa qızıqtırıw, olardı qollap-quwatlaw mámleketlik siyasattıń baslı baǵdarlarınan biri sıpatında qaralmaqta.
Usı tiykarda búgin 24-dekabr kúni Ózbekstan Respublikası Ilimler Akademiyası Qaraqalpaqstan bólimi májilisler zalında alımlar hám jetekshi ilimiy xızmetkerler menen ushırasıw bolıp ótti. Ushırasıwdı Ózbekstan Respublikası Ilimler Akademiyası Qaraqalpaqstan bólimi baslıǵı, Berdaq atındaǵı Qaraqalpaq mámleketlik universiteti rektorı, akademik A.Reymov ashıp berdi hám basqarıp bardı.
Onda Qaraqalpaqstan Respublikası Joqarǵı Keńesi kamiteti baslıǵı M.Atamuratov qatnasıp, ilimiy izertlewlerdi ámeliyatqa engiziw, bul processte joqarı maman qánigeler tayarlaw hám ilim-pán birge islesiwin kúsheytiw áhmiyetli ekenligin aytıp ótti. Sonday-aq, ilimiy izertlewler tarawında ámelge asırılıwı kerek bolǵan wazıypalar, Qaraqalpaqstan Respublikasın sociallıq-ekonomikalıq jaqtan rawajlandırıwda ilim hám bilimlendiriwdiń ornı, bul baǵdarda júzege kelip atırǵan mashqalalar hám de olardıń sheshimine qaratılǵan ilimpazlardıń pikirleri hám usınısların tıńladı.
Ilajda qatnasıwshılar Qaraqalpaqstan aymaǵında ilimiy innovaciyalarǵa tiykarlanǵan ekonomika modelin qáliplestiriw, ekologiyalıq mashqalalardı sheshiwde zamanagóy ilimiy qatnaslardan paydalanıw hám bilimlendiriw sistemasın zamanagóy talaplar tiykarında jetilistiriw máselelerin dodaladı. Sonıń menen birge, jas ilimpazlardı qollap-quwatlaw, olardıń innovaciyalıq joybarların ámelge asırıwda járdem beriw máselelerine ayrıqsha itibar qaratıldı.
Ushırasıw dawamında kóterilgen máseleler boyınsha bir qatar usınıslar alǵa qoyıldı. Sonıń ishinde, aymaqtaǵı joqarı oqıw orınlarında ilimiy izertlew orayların keńeytiw, jaslardı ilimge qızıqtırıw ushın arnawlı baǵdarlamalar islep shıǵıw hám sırt el ilimiy orayları menen birge islesiwdi kúsheytiw boyınsha baslamalar bildirildi.
Bul ushırasıw Qaraqalpaqstan Respublikasınıń sociallıq-ekonomikalıq rawajlanıwında ilim hám bilimlendiriwdiń úzliksiz baylanıslılıǵı, sonday-aq, ilimpazlardıń innovaciyalıq kózqarasları arqalı aymaqtı bunnan bılay da rawajlandırıwǵa xızmet etedi.
QMU baspasóz xızmeti
