Búgin 26-dekabr kúninen baslap, Berdaq atındaǵı Qaraqalpaq mámleketlik universitetinde bilimlendiriw procesin bunnan bılay da jetilistiriw, ilimiy-izertlew hám pedagogikalıq jumısqa jańa qatnaslardı engiziw maqsetinde qısqı dem alıs waqtlarında barlıq fakultet professor-oqıtıwshıları ushın arnawlı oqıw seminarı shólkemlestirildi.

Onda universitet rektorı A.Reymov hám barlıq prorektorlar, bólim baslıqları, barlıq fakultet professor-oqıtıwshıları qatnastı. Dáslep universitet rektorı A.Reymov seminar qatnasıwshılarına házirgi kúnde universitette ilimiy-izertlew, oqıw-metodikalıq, ruwxıy-aǵartıwshıq hám materiallıq-texnikalıq támiynat boyınsha alıp barılǵan jumıslar, sonday-aq, universitette ámelge asırılıp atırǵan tiykarǵı jumıslar, áhmiyetli máseleler hám keleshektegi rejeler haqqında aytıp ótti.

Bunnan soń, seminarda professor-oqıtıwshılarǵa universitette tárbiyalıq jumıslardı jolǵa qoyıw hám huqıqbuzarlıqtıń aldın alıw is-ilajları hám universitet reytingin kóteriw sonıń menen birge, xalıqaralıq baylanıslardı jaqsılaw, joqarı oqıw orınlarında oqıw-metodikalıq processinde tiyisli mashqalalar hám studentlerdiń bilimin bahalaw processin shólkemlestiriw haqqında maǵlıwmatlar berildi.

Seminardıń tiykarǵı maqseti – bilimlendiriwdiń sapasın arttırıw, universitettiń xalıqaralıq reytingin joqarılatıw, professor-oqıtıwshılardı ilimiy-izertlew jumısına keńirek tartıw hám xalıqaralıq birge islesiwdi rawajlandırıwdan ibarat.

Seminar dawamında qatnasıwshılar tárepinen bilimlendiriw procesin jetilistiriw boyınsha usınıslar bildirilip hám kelesi jılda ámelge asırılatuǵın wazıypalar belgilep alındı. Bunday oqıw seminarları bilimlendiriwdiń sapasın arttırıw, professor-oqıtıwshılardıń kásiplik mamanlıǵın bekkemlew hám xalıqaralıq dárejede básekige shıdamlı kadrlardı tayarlaw ushın úlken áhmiyetke iye bolıp tabıladı. Maǵlıwmat ushın: bul oqıw seminarları 2025-jıldıń 7-yanvar sánesine shekem dawam etedi.

QMU baspasóz xızmeti