Usı jıldıń 14-yanvar Watan qorǵawshıları kúni bayramı hám Ózbekstan Respublikası Qurallı Kúshleri shólkemlestirilgenliginiń 33 jıllıǵı Dene mádeniyatı fakultetinde «Tınıshlıǵıń ushın janım pidá – muqaddes Watan!» atamasında ushırasıw ótkerildi. Ushırasıwǵa Dene mádeniyatı fakultetiniń jaslar menen islesiw boyınsha dekan orınbasarı R.Óteniyazov, áskeriy xızmetkerler, tyutorlar hám studentler qatnastı.
Ushırasıwda bayanatshılar házirgi jer júzindegi globallasıw processi, alıs hám jaqın mámleketlerde geosiyasiy háreketler júz berip atırǵan bir payıtta elimiz jasların milliy qádiriyatlarımızǵa sadıq ruwxında tárbiyalaw, olardıń watanǵa bolǵan súyispenshiligin arttırıw hám watanpárwarlıq ruwxında tárbiyalaw, ayırım mámleketlerde júz berip atırǵan tınıshsızlıqlar, yaǵnıy jaslarımızǵa tınıshlıqtıń mazmunı hám áhmiyeti haqqında úgit-násiyatlaw jumısların alıp barıw búgingi kúnniń áhmiyetli wazıypası ekenligin aytıp ótti.

Sonıń menen birge, respublikamızdaǵı ákeriy baǵdar boyınsha ámelge asırılıp atırǵan keń kólemli reformalar, Ózbekstan Respublikası Qurallı kúshleriniń házirgi kúndegi áskeriy jaǵdayı, áskeriy tarawdıń qural-jaraqlar menen támiyinleniwi boyınsha shıǵarılǵan qararlar, jaslardıń watan aldındaǵı minnetli wazıypaları, elimizdiń hár bir qarıs jerin kóz qarashıǵınday asırap abaylaw, oǵan qıyanet etpew, jaslardıń sawatlı, bilimli bolǵanda ǵana watanǵa múnásip perzent bolatuǵınlıǵı, ulıwmalastırıp aytqanda hár tárepleme bárkamal áwladtı tárbiyalap ósiriw hár bir taraw wákilleriniń ádiwli wazıypası ekenligin ayrıqsha atap ótti. Studentler tárepinen bayanatshılardıń basıp ótken ómiri haqqında qızıǵıwshılıq oyatıp olarǵa ózleriniń qızıqtırǵan sorawların berdi hám tiyisli juwapların aldı.

R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı