Búgin 13-yanvar kúni Berdaq atındaǵı Qaraqalpaq mámleketlik universitetinde 2024/2025-oqıw jılınıń qısqı juwmaqlawshı imtixanlar processleri baslandı. Bul imtixanlar studentlerdiń oqıw baǵdarlamasın qay dárejede ózlestirgenin anıqlaw hám bilim dárejesin bahalaw maqsetinde jılına eki márte ótkeriledi. Imtixan processleri universitet rektoratınıń dıqqat itibarında bolıp, onıń ashıq-aydınlıǵı hám ádil ótiwi qatań qadaǵalawǵa alınǵan.

Usı tiykarda universitet rektorı, akademik A.Reymov búgin imtixan processlerin jeke kózden ótkeriw maqsetinde bir neshe auditoriyalarda bolıp, ol jerde studentler ushın jaratılǵan sharayatlar, imtixan sorawlarınıń dúzilisi, processlerdiń shólkemlestirilgenlik dárejesi menen jaqınnan tanıstı. Ol studentlerdiń bilim hám kónlikpelerin bahalaw procesi pútkilley ádil bolıwı kerek ekenligin atap ótip, imtixanlardı ótkeriw boyınsha juwapker shaxslarǵa tiyisli tapsırmalar berdi. Sebebi bilimlendiriwdiń sapasın arttırıwda ashıq-aydın hám qalıs bahalaw processleriniń áhmiyetli orın iyeleytuǵının aytıp ótti.

Sonday-aq, rektor A.Reymov imtixan processleri boyınsha student-jaslar menen sáwbetlesip, olardıń pikir-usınısların tıńladı. Studentler óz gezeginde imtixanlardıń joqarı tártip-intizam tiykarında ótip atırǵanın hám olarǵa barlıq sharayatlar jaratılǵanın bildirdi.

Maǵlıwmat ushın; universitette imtixanlar dawamında ashıq-aydınlıq hám qalıslılıqtı támiyinlew maqsetinde arnawlı jumısshı toparlar dúzilgen bolıp, olar imtixan processlerin qadaǵalaw menen shuǵıllanbaqta. Qısqı imtixanlar universitettiń barlıq fakultetlerinde dawam etedi hám studentlerdiń teoriyalıq bilimleri menen bir qatarda ámeliy kónlikpeleri de sınaqtan ótedi. Bul processler arqalı tek ǵana studentler óz bilim dárejesin arttırıp qoymay, al universitettiń bilimlendiriw sapasın hám abırayın arttırıwǵa xızmet etetuǵın áhmiyetli juwmaqlar da alınadı.

QMU baspasóz xızmeti