Búgin 14-yanvar kúni Berdaq atındaǵı Qaraqalpaq mámleketlik universiteti májilisler zalında Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Joqarı Attestaciya komissiyası baslıǵı A.Yusupov penen universitet janındaǵı ilimiy dárejeler beriwshi ilimiy keńesler hám ilimiy seminar baslıqları, xatkerleri, joqarı tálimnen keyingi tálimde oqıp atırǵan tayanısh doktorantlar, doktorantlar hám de óz betinshe izleniwshiler menen ushırasıw májilisi bolıp ótti. Onda Qaraqalpaqstan Respublikası Ministrler Keńesi baslıǵınıń orınbasarı B.Ótemuratov ta qatnastı.
Usharasıwdı Qaraqalpaq mámleketlik universiteti rektorı, akademik A.Reymov ashıp berdi hám basqarıp bardı. Májiliste Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Joqarı Attestaciya komissiyası baslıǵı A.Yusupov shıǵıp sóylep, ilimiy tarawda keyingi jıllarda ámelge asırılıp atırǵan barlıq reformalar, is-ilajlar hám olardıń nátiyjeleri haqqında keńnen toqtalıp ótti. Solar qatarında, basqa joqarı oqıw orınları hám ilimiy izertlew mákemeleri menen birgelikte Berdaq atındaǵı Qaraqalpaq mámleketlik universitetinde de ilimiy-pedagog kadrlar tayarlawda universitet basshılıǵı, universitet janındaǵı búgingi kúnde jumıs alıp barıp atırǵan jámi 11 ilimiy dárejeler beriwshi Ilimiy Keńeslerdiń nátiyjeli jumısları haqqında keń túrde maǵlıwmatlar berildi. Bayanatshı, sonday-aq, doktorantlar, tayanısh doktorantlar hám óz betinshe izleniwshilerge ilimiy jumısların qorǵaw baǵdarında elede keń imkaniyatlar jaratıw, solar qatarında hayal qızlarǵa qosımsha jeńillikler, ilimiy keńesler jumıslarında ilimiy dárejelerge talabanlar ushın ilim qánigeliklerin elede asırıw, búgingi kúnde jańadan ilimiy keńeslerdi shólkemlestiriw, sonday-aq, ilimiy izertlew baǵdarındaǵı jańalıqlar menen jıynalıs qatnasıwshıların keń mazmunda tanıstırıp ótti.
Jıynalıs joqarı shólkemleskenlik penen ótkerilip, jıynalıs dawamında universitet tayanısh doktorantları, doktorantları hám óz betinshe izleniwshileri, ilimiy keńesler baslıqları hám aǵzaları tárepinen ózlerin qızıqtırǵan sorawlar, pikir hám usınıslar berilip, bul boyınsha bayanatshı hám shıǵıp sóylewshiler tárepinen unamlı juwaplar alındı.
QMU baspasóz xızmeti
