Xabarıńız bar, Ózbekstan Respublikası Ishki isler ministrligi tárepinen 2025-jıldıń 1-fevral kúninen 1-mart kúnleri aralıǵında “Jaslar arasında náshebentlik quralları hám psixatrop zatlar tarqalıwınıń aldın alıw” aylıǵı dep belgilendi. Usı tiykarda búgin, Berdaq atındaǵı Qaraqalpaq mámleketlik universitetinde ilaj bolıp ótti. Onda Nókis qalasındaǵı joqarı oqıw orınlarınıń tyutorları, profilaktika inspektorlar, pedagog tárbiyashılar, universitet student-jaslar, ishki isler uyımlarınıń xızmetkerleri qatnastı. Sonıń menen birge, ilajda Ózbekstan Respublikası Ishki isler ministrligi operativ qıdırıw deportamentiniń jınayat qıdırıw xızmeti basqarma baslıǵı orınbasarı, polkovnik Axmadjon Matlyubov, operativ qıdırıw deportamentiniń ayrıqsha isler boyınsha operativ wákil, podpolkovnik Farrux Rajapov, operativ qıdırıw deportamentiniń ayrıqsha isler boyınsha operativ wákil, mayor Paxlovon Azimbekov, Qaraqalpaqstan Respublikası Ishki isler ministrligi operativ qıdırıw xızmetiniń jınayat qıdırıw basqarması baslıǵı, polkovnik Diyor Latipov, AIJSqa qarsı gúresiw orayı anonim xanası shıpakeri Elmira Gulimbetova, Respublika qánigelestirilgen ruwxıy salamatlıq ámeliy medicina orayınıń narkologiya xızmeti boyınsha Qaraqalpaqstan Respublikası filialınıń narkolog shıpakeri, májbúriy emlew bólimi meńgeriwshisi Ruslan Atanazarovlar miymanda boldı.
Ilajdı universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov ashıp berdi hám alıp bardı. Ilajda sózge shıqqanlar jaslar arasında náshebentlik quralları hám psixotrop zatlardıń tarqalıwınıń aldın alıw, bul illettiń insan salamatlıǵına hám jámiyetke jetkeretuǵın zıyanlı tásiri sonday-aq, náshebentlik tek ǵana individual mashqala emes, al pútkil jámiyetke qáwip tuwdıratuǵın global másele ekenin atap ótti. Bunnan soń, taraw qánigeler tárepinen narkotik zatlardı paydalanıwdıń aqıbetleri, olarǵa qarsı gúresiwdiń huqıqıy tiykarları hám mámleket tárepinen alıp barılıp atırǵan profilaktikalıq ilajlar haqqında túsindiriw jumısları alıp barıldı. Ilajda qatnasıwshılar óz pikir-usınısların bildirip, náshebentlikke qarsı gúresiwde jámiyettiń barlıq aǵzaları birgelikte háreket etiwiniń áhmiyetli ekenligin atap ótti. Ilaj dawamında universitettiń talantlı studentleri tárepinen koncert baǵdarlaması hám saxna kórinisler jıynalǵanlar názerine usınıldı.
Bul ilaj jaslardı jat ideyalardı qorǵaw, olardıń huqıqıy bilimlerin arttırıw hám jámiyette salamat turmıs tárizin úgit-násiyatlawǵa qaratılǵan háreketlerdiń bir bólegi boldı. Bul aylıq sheńberinde túrli úgit-násiyatlaw jumısları, seminarlar, ruwxıy-aǵartıwshılıq ushırasıwlar hám sport jarısları da shólkemlestiriliwi rejelestirilgen. Berdaq atındaǵı Qaraqalpaq mámleketlik universiteti basshıları hám Ishki isler ministrliginiń wákilleri bunday ilajlar jaslardıń keleshegi ushın úlken áhmiyetke iye ekenin atap ótip, bársheni sergeklikke shaqırdı.
QMU baspasóz xızmeti
