Búgin, 31-yanvar kúni Berdaq atındaǵı Qaraqalpaq mámleketlik universitetinde universitet rektorı, akademik A.Reymov basshılıǵında májilis bolıp ótti. Onda barlıq prorektorlar, bólim baslıqları, fakultet dekanları hám kafedra baslıqları qatnastı. Bul májiliste tálim-tárbiya processlerin bunnan bılay da jetilistiriw, sonday-aq, jınayashılıq hám huqıqbuzarlıqlardıń aldın alıw máseleleri hár tárepleme dodalandı. Dáslep rektor A.Reymov shıǵıp sóylep, student-jaslardıń tek ǵana bilim alıwı emes, al kámil insan bolıp qáliplesiwi ushın tálim menen tárbiyanı teń alıp barıw kerek ekenligin, onda professor-oqıtıwshılar, fakultet dekanları, kafedralar hám juwapker xızmetkerler óz jumısın nátiyjeli shólkemlestiriwi áhmiyetli ekenligin atap ótti.
Sonıń menen birge, májiliste studentlerdiń kiyiniw mádeniyatına da ayrıqsha itibar qaratıw, universitet ishki tártip-qaǵıydalarına muwapıq kiyiniw mádeniyatın qáliplestiriw zárúrligin atap ótip, bul boyınsha juwapkerlerge anıq kórsetpeler berdi. Bunnan soń, studentlerdiń bos waqtların mazmunlı ótkeriw, olar ushın ruwxıy-aǵartıwshılıq ilajlardı kóbeytiw, sport hám pán dógereklerge tartıw kerek ekenligin aytıp ótti. Sonday-aq, májiliste bilimlendiriw procesin ámeliyat penen úzliksiz baylanıstırıw maqsetinde dual tálimdi jolǵa qoyıw, sonıń menen birge, universitet hám óndiris kárxanaları arasında xojalıq shártnamaların dúziw, ilimiy izertlew nátiyjelerin ámeliyatqa engiziw, xojalıq subektleri menen birge islesiwdi rawajlandırıw, innovaciyalıq joybarlardı ámelge asırıw boyınsha anıq usınıslar berildi.
Májilis dawamında rektor A.Reymov barlıq juwapkerlerge 2025-jılda universitetti rawajlandırıw maqsetinde islep shıǵılǵan jol kartasınıń óz waqtında orınlanıwın támiyinlew boyınsha tapsırmalar berdi. Májiliste dodalanǵan máseleler boyınsha anıq ilajlar islep shıǵılıp, orınlanıwı boyınsha turaqlı qadaǵalaw alıp barılatuǵınlıǵın aytıp ótti.
QMU baspasóz xızmeti
