Búgin, 5-fevral kúni Izrail mámleketiniń Ózbekstan Respublikasındaǵı elshixanasınıń konsulı Liron Mizraxi Unger Qaraqalpaqstan Respublikasına xızmet saparı sheńberinde Berdaq atındaǵı Qaraqalpaq mámleketlik universitetinde boldı. Dáslep miymanlardı universitettiń Ilimiy isler hám innovaciyalar boyınsha prorektor I.Turdımambetov, Oqıw isleri boyınsha prorektorı O.Duysenbaevlar kútip alıp, universitetiniń tariyxı, dúzilisi, oqıw processleri hám xalıqaralıq birge islesiw tarawındaǵı jumısları haqqında maǵlıwmat berdi. Ushırasıwda Shet tilleri, Yuridika, Ekonomika fakulteti dekanları, professor-oqıtıwshılar, student-jasları qatnastı.
Ilajdı Qaraqalpaqstan Respublikası Ministrler Keńesi Baslıǵınıń orınbasarı R.Zarekeev ashtı hám alıp bardı. Ushırasıwda Liron Mizraxi Unger universitet jámááti hám studentlerge óziniń qızǵın tileklerin bildirip, Ózbekstan hám Izrail arasındaǵı bilimlendiriw tarawındaǵı birge islesiw perspektivaları haqqında aytıp ótti. Ol Izrail joqarı bilimlendiriw mákemeleri, innovaciyalıq joybarlar hám ilimiy izlenisler baǵdarında óz tájiriybesi menen ortaqlastı. Sonday-aq, Izrail elshixanası hám Ózbekstan universitetleri arasında akademiyalıq baylanıslardı jáne de rawajlandırıw hám studentler ushın hár qıylı joybarlar shólkemlestiriw imkaniyatları haqqında pikir bildirdi. Studentler Izraildıń bilimlendiriw sisteması, ilim jetiskenlikleri hám birge islesiw baǵdarlamaları haqqında ózlerin qızıqtırǵan sorawlardı berip, konsul menen ashıq sáwbetlesti. Ushırasıw juwmaǵında tárepler bilimlendiriw tarawında óz-ara baylanıslardı bekkemlew hám ilimiy izertlewler baǵdarında birgeliktegi baslamalardı jolǵa qoyıw áhmiyetli ekenligin atap ótti.
Ushırasıw dawamında universitettiń Ilimiy isler hám innovaciyalar boyınsha prorektor I.Turdımambetov sózge shıǵıp universitette ámelge asırılıp atırǵan ilimiy izleniwler, akademiyalıq almasıw baǵdarlamaları hám studentlerdiń sırt el bilimlendiriw mákemeleri menen birgeliktegi joybarlarında belsene qatnasıp atırǵanın aytıp, kelgen miymanlarǵa óz minnetdarshılıǵın bildirdi. Bul ushırasıw Ózbekstan-Izrail qatnasıqlarınıń jáne bir ámeliy kórinisi bolıp, eki mámlekettiń bilimlendiriw tarawındaǵı birge islesiwin jańa basqıshqa alıp shıǵıw ushın áhmiyetli qádem boldı.
QMU baspasóz xızmeti
