Aldın xabar bergenimizdey, házirde Qaraqalpaqstan Respublikası delegaciya aǵzaları Kambodja paytaxtı Pnom Pen qalasında Paragon xalıqaralıq universitetinde Samarqand qalasında bolıp ótetuǵın YUNESKO Bas konferenciyasınıń 43-sessiyasına tayarlıq processleri sheńberinde «Ózbekstannıń mádeniy miyrası hám reformaları» atamasında úgit-násiyatlaw ilajın alıp barmaqta.
Onda Qaraqalpaqstan Respublikası Ministrler Keńesi Baslıǵınıń orınbasarı Bayram Ótemuratov, Qaraqalpaqstan Respublikası Mádeniyat ministri B.Temirbaev, Berdaq atındaǵı Qaraqalpaq mámleketlik universiteti rektorı, akademik A.Reymovlar qatnaspaqta. Dáslep ata-babalarımızdan qalǵan bay miyraslarımız, milliy úrp-ádetlerimiz sáwlelendiriwshi ónermentlerdiń qol ónerlerinen tayarlanǵan kórgizbeler menen tanıstırıldı.
Bunnan soń, mádeniy ilajǵa náwbet berildi. Ilajda Berdaq atındaǵı Qaraqalpaq mámleketlik universiteti rektorı, akademik A.Reymov sózge shıǵıp, Samarqandta YUNESKOnıń 43-sessiyası ótkeriletuǵını hám bul ánjuman pútkil xalıqaralıq mádeniy hám ilimiy jámiyeshilik ushın áhmiyetli ekenin aytıp ótti. Sonday-aq, YUNESKO sessiyası bilim, mádeniy dástúrler almasıw hám xalıqaralıq birge islesiwdi bekkemlew ushın úlken imkaniyat ekenin, bul ushırasıw dúnya mádeniy miyrasın qásterlep saqlaw hám úgit-násiyatlawǵa xızmet etetuǵının ayrıqsha atap ótti.
Haqıyqatında da bul ilajlar mámleketimiz rawajlanıwınıń úsh mıń jıldan aslam tariyxı, dúnya civilizaciyasına sheksiz úles qosqan ullı ata-babalarımızdıń ilimiy, mádeniy hám ruwxıy miyrası jáne mámleketimizde ámelge asırılıp atırǵan reformalardıń nátiyjelerin sırt mámleketlerde keńnen úgit-násiyatlaw arqalı birge islesiwdi bunnan bılay da rawajlandırıwda ózine tán kópir wazıypasın atqarmaqta.
