Usı jıldıń 14-fevral kúni Berdaq atındaǵı Qaraqalpaq mámleketlik universitetinde jaslar arasında júz berip atırǵan jınayatlardıń aldın alıw hám oǵan qarsı gúresiw máselelerine baǵıshlanǵan ushırasıw bolıp ótti. Ilajda Qaraqalpaqstan Respublikası Ishki isler ministrliginiń Jámiyet qáwipsizlik xızmeti, huqıqbuzarlıqlar profilaktikası basqarması baslıǵı orınbasarı, podpolkovnik Xurzada Reymkulova, Qaraqalpaqstan Respublikası Ishki isler ministrliginiń Jámiyet qáwipsizlik xızmeti, huqıqbuzarlıqlar profilaktikası basqarmasınıń Jaslar hám jas óspirimler máseleleri boyınsha aǵa inspektorı, mayor Gaydar Akimniyazov, Ózbekstan Respublikası Din isleri boyınsha komitetiniń Qaraqalpaqstan Respublikası aymaqlıq basqarması bas qánigesi Nurılla Jamalov, Qaraqalpaqstan Respublikası Ishki isler ministrliginiń Terrorizmge qarsı gúresiw basqarması bólimi baslıǵı Nurlıbek Tajimuratov, Qaraqalpaqstan Respublikası Ishki isler ministrliginiń Operativ Kiber qáwipsizlik bólimi aǵa qánigesi leytenant Jalǵasbay Qıdırbaev, Ózbekstan Respublikası Ishki isler ministrligi Akademiyası 3-basqısh kursantı Qurbanbaev Yodgor Maxmud ulı hám Asıl Tuliev hám universitettiń barlıq fakultettiń jaslar menen islesiw boyınsha dekan orınbasarları, pedagog-tárbiyashılar hám tyutorlar qatnastı.

Ushırasıwdı universitettiń oqıw isleri boyınsha prorektorı O.Duysenbaev shıp berdi hám alıp bardı. Ilajda sózge shıqqanlar jaslar arasında ushırasıp atırǵan jınayat túrleri, olardıń kelip shıǵıw sebepleri hám huqıqıy aqıbetleri haqqında tolıq túsinikler berdi. Atap aytqanda, studentlerdiń huqıqıy bilimin arttırıw, jınayashılıqtıń aldın alıw, internet hám sociallıq tarmaqlardan paydalanıwdaǵı qáwip-qáterler sıyaqlı temalarǵa ayrıqsha itibar qaratıldı.Sonday-aq, ushırasıwda jınayashılıqtıń aldın alıwda bilimlendiriw mákemeleri, ata-analar hám jámiyettiń ornı áhmiyetli ekeni atap ótildi. Studentlerge hár qıylı nızamsız háreketlerden tıyılıw, óz huqıq hám minnetlemelerin biliw, sonday-aq, gúmanlı jaǵdaylar haqqında tiyisli uyımlarǵa xabar beriw zárúr ekenligi túsindirildi.Ilaj juwmaǵında qatnasıwshılar huqıq qorǵaw uyımlarınıń wákillerine ózlerin qızıqtırǵan sorawlar menen múrájat etip, jınayashılıqtıń aldın alıw boyınsha áhmiyetli maǵlıwmatlarǵa iye boldı. Ushırasıw dawamında jaslardıń huqıqıy mádeniyatın arttırıw, sociallıq juwapkershiligin kúsheytiw hám salamat ortalıq jaratıw boyınsha bir qatar usınıslar alǵa qoyıldı.