Ózbekstan Respublikası Prezidentiniń 2017-jıl 14-mart kúngi «Huqıqbuzarlıq profilaktikası hám jınayatshılıqqa qarsı gúresiw sistemasın jáne de jetilistiriw is-ilajları haqqında»ǵı PQ-2833-sanlı qararına muwapıq hápteniń hár piyshembi kúni huqıqbuzarlıq profilaktikası kúni dep belgilengen. Usı múnásibet penen 20-fevral kúni Dene mádeniyatı fakultetiniń student-jasları arasında profilaktikalıq úgit-násiyatlaw ilajı ótkerildi. Ilajǵa Dene mádeniyatı fakulteti jaslar menen islesiw boyınsha dekan orınbasarı R.Óteniyazov, Respublikalıq qánigelestirilgen narkologiya dispanseriniń narkolog shıpakeri A.Samarxanova, Respublikalıq AIJSqa qarsı gúresiw orayı shıpakerleri F.Tursınova, B.Begjanova, A.Amanova, tyutorlar hám student-jaslar qatnastı.
Ilajda bayanatshılar jaslar arasında náshebentlik zatlarınıń tarqalıwına qarsı gúresiw, jaslardıń náshebentlikke berilmewi, narkotik zatlarınıń zıyanlı, AIJStıń ayanıshlı hám awır aqıbetleri, bul illet aqıbetinde jınayatshılıq hám de huqıqbuzarlıq jaǵdayları kelip shıǵatuǵınlıǵı, bunday illetke qarsı bárshe jaslar birgelikte gúresiwleri lazım ekenligi, sonday-aq, milletlerara tatıwlıqtı bekkemlew, urlıq islew, qumar oynaw, óz-ara jánjellesiw, zorlıq hám basım ótkeriw, jol háreketi qáwipsizligi qaǵıydaları, spirtli ishimlikler ishiw, kewil ashar orınlarǵa barıw, korrupciya, aldawshılıq, tonawshılıq, diniy material tarqatıw, diniy ekstremizm, kiberjınayat sıyaqlı jınayatlardıń awır aqıbetleri, olarǵa qollanılatuǵın nızam tiykarındaǵı sharalar boyınsha óz túsiniklerin berip ótti. Ilaj dawamında studentlerge náshebentlik zatlar, AIJS hám kiberjınayatshılıǵınıń aldın alıwǵa qaratılǵan úgit-násiyat (buklet hám flaerler) materialları tarqatıldı.
Studentler ózleriniń qızıqtırǵan sorawlarına tiyisli juwaplar aldı. Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
