Búgin, 22-fevral kúni Berdaq atındaǵı Qaraqalpaq mámleketlik universitetinde rektor, akademik A.Reymov basshılıǵında májilis bolıp ótti. Májiliste universitettiń barlıq prorektorları, fakultet dekanları hám kafedra baslıqları qatnastı. Dáslep universitet rektorı A.Reymov universitettiń strategiyalıq rawajlanıwı, zamanagóy talaplarǵa juwap beretuǵın bilimlendiriw sistemasın qáliplestiriw máselelerine toqtap ótti. Atap aytqanda, investiciyalar tartıw, tálim eksportın keńeytiw, dual tálim sistemasın engiziw, ilimiy potencialdı arttırıw hám jaslardıń tálim-tárbiyasın bunnan bılay da jetilistiriw boyınsha áhmiyetli máselelerdi aytıp ótti.
Yaǵnıy investiciya máselesinde universitet infrastrukturasın modernizaciyalaw, zamanagóy laboratoriyalar shólkemlestiriw hám xalıqaralıq grantlardı tartıw baǵdarındaǵı rejelerge itibar qaratıldı. Sonday-aq, sırt el joqarı oqıw orınları menen birge islesiwdi kúsheytiw, qospa baǵdarlamalardı jolǵa qoyıw arqalı bilimlendiriw eksportın arttırıw perspektivaları haqqında da sóz etti. Sonıń menen birge, májiliste dual tálim sistemasın engiziw boyınsha sóz etip, rektor A.Reymov studentler ámeliy bilim hám kónlikpelerge iye bolıwı ushın óndiris kárxanaları menen birge islesiwdi bekkemlew zárúrligin atap ótti. Bul sistema bilimlendiriw procesin óndiris penen baylanıstırıw, pitkeriwshilerdiń miynet bazarında básekige shıdamlılıǵın arttırıw imkaniyatın beretuǵını atap ótti.
Májiliste ilimiy potencialdı arttırıw sheńberinde professor-oqıtıwshılardı ilimiy izertlewlerge tartıw, jas ilimpazlardıń jumısın qollap-quwatlaw hám universitettiń ilimiy jurnallar menen birge islesiwin keńeytiw, xalıqaralıq ilimiy konferneciyalarda universitet ilimpazlarınıń qatnasıwın xoshametlew máseleleri kórip shıǵıldı. Jaslar tálim-tárbiyasına baylanıslı máselelerde bolsa studentlerdi milliy qádiriyatlarǵa sadıq, ruwxıy jetik shaxslar etip tárbiyalawǵa ayrıqsha itibar qaratıldı. Olardıń bos waqıtların mazmunlı shólkemlestiriw, sport hám mádeniy ilajlarǵa tartıw, sociallıq joybarlarda qatnasıwın xoshametlew ilajları belgilendi. Májilis sońında universitet rektorı A.Reymov barlıq juwapkerlerge belgilengen baǵdarlar boyınsha anıq tapsırmalar berdi hám bilimlendiriwdiń sapasın bunnan bılay da arttırıw baǵdarında nátiyjeli jumıs alıp barıw zárúrligin atap ótti. Bul májilis universitet jámááti aldında turǵan tiykarǵı wazıypalardı belgilep alıwda úlken áhmiyetke iye boldı.
