Ózbekstan Respublikası Prezidenti Sh.M.Mirziyoev 2020-jılı Oliy Majliske jollaǵan Múrájatında «Mádeniyat hám kórkem óner mákemelerine ayrıqsha dıqqat qaratıw, olardıń materiallıq-texnikalıq bazasın bekkemlew ilajların kóriw zárúr»,-dep eskerte otırıp, ruwxıy mádeniyatımızdı jetilistiriwde «Biz jadidshilik háreketi, aǵartıwshı babalarımız miyrasın tereń úyreniwimiz kerek. Bul ruwxıy ǵáziyneni qansha kóp úyrensek, búgingi kúnde de bizdi táshwishke salıp atırǵan júdá kóp sorawlarǵa tuwrı juwap tabamız. Bul biybaha baylıqtı qansha keń kólemde násiyatlasaq, xalqımız, ásirese jaslarımız búgingi tınısh hám erkin turmıstıń qádirin ańlap jetedi»-dep keleshek jaslarımızdı tereń bilimli, joqarı mánáwiyatlı hám mádeniyatlı etip tárbiyalaw wazıypasın belgilep berdi. Usı múnásibet penen Berdaq atındaǵı Qaraqalpaq mámleketlik universiteti Tariyx fakulteti 4-kurs tariyx hám arxeologiya baǵdarı pitkeriwshi kurs ámeliyatshıları Nókis qalası №22-sanlı qánigelestirilgen mektebinde «Jadid aǵartıwshılarınıń tariyxımızda tutqan ornı» temasındaǵı ilimiy – ámeliy konferenciyası bolıp ótti. Konferenciyanı shólkemlestiriwde ámeliyat basshıları Ózbekstan hám Qaraqalpaqstan tariyxı kafedrası w.a docent, Phd. J.Aytmuratova, Arxeologiya kafedrası oqıtıwshıları D.Ametov hám B.Qalimbetovlar jaqınnan járdem kórsetip studentler menen hár qıylı saxnalıq kórinisler saxnalastırıldı. Konferenciyada Arxeologiya kafedrası assisenti D.Ametov sózge shıǵıp, bunda Prezidentimizdiń 2023-jılı 22-dekabr kúni mánáwiyat hám aǵartıwshılıq keńesiniń keńeytilgen májilisindegi «Mánáwiyat ómirimizde jańa kúsh, jańa háreketke aylanıwı kerek» ekenin eskerte otırıp, «mámleketimiz óz rawajlanıwınıń jańa, joqarı basqıshına kóterilip atırǵan házirgi waqıtta bizge jadid babalarımız sıyaqlı Batıs iliminiń jetiskenlikleri menen birge, milliy qádiriyatlar ruwxında tárbiyalanǵan jetik kadrlar suw menen hawaday zárúr» degen pikiri XX ásir basındaǵı Turkistan úlkesindegi jadidshilik háreketi wákilleriniń baslı maqseti elimizdiń ǵárezsiz mámleketke erisiwi jolında, keleshek jaslarımızǵa dúnyalıq bilim beriwge umtılǵanın, Batıs Evropa ilimiy jetiskenlikleri menen qurallandırıwǵa háreket etkenin ayrıqsha atap kórsetti. Sonıń menen birge mektep direktorınıń ruwxıylıq-aǵartıwshılıq boyınsha orınbasarı G.Aymurzaeva, mekteptiń tariyx páni oqıtıwshıları Z.Esenbaeva, A.Kalilaevalar tárepinen jádidlerdiń tariyxtaǵı tutqan ornı haqqında atap ótti. Sonday-aq, keshe dawamında Ámeliyatshı studentler tarepinen Túrkistan jádidleri hám qaraqalpaq aǵartıwshılarınan Seyfulǵabit Majitov, Xamza Xakimzada Niyaziylardıń Jadidshilik xızmeti hám aǵartıwshılıq kóz-qarasları haqqında bayanatlar tayarlandı. Sonıń menen birge, ámeliyatshılar tárepinen saxnalastırılǵan saxnalıq kórinisler, mektep oqıwshıları tárepinen tayarlanǵan milliy ayaq oyınlar mektep oqıwshılarınıń yadında tárbiyalıq xarakteri menen bir ómir saqlanıp qaları sózsiz.
Arxeologiya kafedrası assisenti B.Qalimbetov
