Aldın xabar bergenimizdey, búgin 7-mart kúni Berdaq atındaǵı Qaraqalpaq mámleketlik universitetinde 8-mart – Xalıqaralıq hayal-qızlar bayramı múnásibeti menen bayram ilajı bolıp ótti. Bul saltanatlı ilajda universitettiń professor-oqıtıwshılar, húrmetli ustazlar, student-jaslar qatnastı.
Ilajdı universitet rektorı, akademik A.Reymov ashıp berdi. Ol barlıq hayal-qızlardı bayram menen qızǵın qutlıqlap, olardıń jámiyettegi, ilim hám bilimlendiriw tarawındaǵı teńsiz ornın ayrıqsha atap ótti. Rektor óz sózinde hayal-qızlardı qádirlew hám olardı hár tárepleme qollap-quwatlaw baǵdarında mámleketimizde alıp barılıp atırǵan reformalarǵa toqtap ótip, hayal-qızlar ushın jaratılıp atırǵan sharayatlar joqarı itibardan dárek beretuǵının atap ótti.
Bunnan soń, Qaraqalpaqstan Respublikası Joqarǵı Keńesiniń komitet baslıǵı M.Atamuratov shıǵıp sóylep, jıynalǵanlardı Qaraqalpaqstan Respublikası Joqarǵı Keńesi hám Qaraqalpaqstan Respublikası ministrler Keńesi atınan bayram menen qutlıqladı. Ol hayal-qızlardıń jámiyetlik turmıstaǵı ornı, ilim hám mádeniyattıń rawajlanıwına qosıp atırǵan úlesi, sonday-aq, jas áwladtıń tárbiyasındaǵı xızmetleri haqqında aytıp ótti. Bayram ilajı dawamında universitettiń Kórkem óner fakulteti jámááti tárepinen tayarlanǵan koncert baǵdarlaması qoyıp berildi. Bul baǵdarlamada milliy hám zamanagóy qosıqlar, ayaq oyınlar, kórkem shıǵıwlar jáne janlı atqarıwlar tamashagóylerge usınıldı. Muzıkalıq shıǵıwlar zalda bayram keypiyatın jaratıp, jıynalǵanlarǵa umıtılmas demlerdi sawǵa etti.
Ilaj sheńberinde universitette jumıs alıp barıp atırǵan bir qatar hayal-qızlar professor-oqıtıwshılar hám xızmetkerlerdiń miyneti tán alınıp, olarǵa estelik sawǵaları tapsırıldı. Sonday-aq, ilaj sheńberinde viktorinalıq oyınlar ótkerilip, jeńimpazlarǵa sawǵalar tapsırıldı. Sonıń menen birge, Xalıqaralıq hayal-qızlar bayramı múnásibeti menen universitet hayal-qızları ushın bayram dasturqanı jayıldı. Bul bayram ilaji hámmede mzgeshe tásir qaldırıp, mehir-muhabbat, húrmet-izzet ortalıǵında juwmaqlandı.
