Búgin, 11-mart kúni Berdaq atındaǵı Qaraqalpaq mámleketlik universitetinde «Jasıl mákan» ulıwma milliy joybarı sheńberinde keń kólemli ilajlarǵa start berildi. Bul baslama sheńberinde universitet jámááti hám student-jaslar qorshaǵan ortalıqtı jáne de abadanlastırıw, ekologiyalıq ortalıqtı jaqsılaw maqsetinde birlesti. Ilaj universitet rektorı A.Reymov basshılıǵında shólkemlestirilip, barlıq qatnasıwshılar óz pidayılıǵı hám jaqsı niyetleri menen terek nállerin egiw procesinde belsene qatnastı. Olar tek ǵana universitet aymaǵın jáne de kórkemlestiriw emes, al keleshek áwladlarǵa taza hám jasıl ortalıq qaldırıw jolında óz úleslerin qostı.
«Jasıl mákan» joybarı pútkil mámleket boylap ámelge asırılıp atırǵan áhmiyetli baslamalardan biri bolıp, onıń tiykarǵı maqseti qorshaǵan ortalıqtı qorǵaw, jasıl maydanlardı keńeytiw hám ekologiyalıq mádeniyattı arttırıw bolıp esaplanadı. Usı múnásibet penen Qaraqalpaq mámleketlik universiteti de bul iygilikli háreketke qosılıp, jaslardı tábiyatqa mehir-muhabbat ruwxında tárbiyalawǵa ayrıqsha itibar qaratpaqta. Ilaj dawamında universitet jámááti tárepinen hár qıylı sayamanlı terek hám miywe nálleri egildi. Qatnasıwshılar bul processte óz bilim hám tájiriybelerin bólisip, ekologiyalıq ortalıqtı jaqsılaw boyınsha pikir alıstı. Rektor A.Reymov óziniń shıǵıp sóylegen sózinde tábiyatqa ǵamxorlıq etiw hám qorshaǵan ortalıqtı qorǵaw máseleleriniń áhmiyetliligin atap ótip, professor-oqıtıwshılardı, student-jaslardı usınday baslamalarda belsene qatnasıwǵa shaqırdı.
Universiteti tárepinen shólkemlestirilgen bul ilaj «Jasıl mákan» joybarı sheńberinde ámelge asırılıp atırǵan keń kólemli jumıslardıń gezektegi basqıshı bolıp, keleshekte de usınday ilajlardı dawam ettiriw rejelestirilgen. Universitet jámááti hám studentlerdiń háreketleri menen egilgen hár bir terek keleshek áwladlar ushın taza hawa, saya-salqın mákan hám tábiyatqa jaqın ortalıq jaratıwda áhmiyetli orın iyeleydi. Bul baslama tek ǵana qorshaǵan ortalıqtı abadanlastırıwǵa emes, al student-jaslardıń ekologiyalıq mádeniyatın arttırıwǵa da xızmet etedi. Universitet jámááti keleshekte de bunday ekologiyalıq baslamalarda belsene qatnasıp, tábiyattı saqlaw hám jasıl ortalıq jaratıw jolında pidayılıq penen miynet etiwdi dawam ettiriwdi maqset etken.
