Urıs! Bul sózdi  esitkende insan júreginde qanday da bir qorqınısh sezimi payda boladı.

Usı  jılı Ekinshi jer júzlik urısta fashizm ústinen erisilgen jeńiske 74 jıl toldı. Aradan qansha jıllar ótse de, sol qanlı sawashta jan bergen ata babalarımızdıń búgingidey tınısh, tatıw hám abadan turmıs ushın gúresleri hesh qashan esimizden ketpeydi.

Mine, usınday Watan tınıshlıǵı jolında jan bergen insanlardıń biri Narmanov Qádirbay. Qaraqalpaq filologiyası 2-b kurs studentleri, ruwxıylıq isleri boyınsha dekan orın basarı Z.Jumanov hám  topar basshımız I.Allambergenova  menen birgelikte veterannıń hal jaǵdayınan xabar alıw hám qaharmannıń mártlik islerin eske alıw maqsetinde úyine bardıq. Biz bul insan menen sáwbetlesip otırıp, onıń 1925-jılı  Ámiwdárya rayonında tuwılǵanın, qay jerlerde sawashlarda bolǵanın bilip aldıq. Veteran házirgi kúnde Nókis qalası Samanbay elatı 7-kóshesin de jasaydı. Onıń 4 qız, 2 ulı bolıp, olardan 35 aqlıq, 41 shawlıqtıń súyikli atası.

Usınday watanımızdıń tınıshlıǵı ushın janın da beriwge tayar bolǵan ata-babalarımızdan biz máńgi  minnetdarmız. Olardıń erlikleri hámiyshe biz jaslardı ruwxlandırıp, ata mákándı súyiwge hám erkinliktiń qádirine jetiwge shaqırıp turadı.

Móldir Kaypnazarova,

Qaraqalpaq filologiyası 2b kurs studenti.