Hárqanday mámleketttiń erteńgi kúni hám keleshegin belgileytuǵın nárse – bul sol mámlekettiń kámil jasları.
Xalqımız ázelden áwlad dawamshıları bolǵan perzentleriniń tárbiyasına, kámil insan bolıp jetlisiwine ayrıqsha kewil bólgen. Mine usı qádiriyat búgingi kúnde respublikamızda bes baslama tiykarında rawajlandırılmaqta.
Húrmetli Prezidentimiz basshılıǵında 2019-jıl 19-martta jaslardıń mánawiyatın joqarılatıw hám olardıń bos waqtın mazmunlı shólkemlestiriw boyınsha bes baslı baslama alǵa súrilgen edi. Usı baslama sheńberinde mámleketimizde kóplegen mádeniy hám aǵartıwshılıq ilajları ótkerilmekte. Óz gezeginde bul ilajlarda jaslardıń belsendiligi de joqarı. “Bes baslama – bes imkaniyat”, “Bes baslama – keleshegim tiykarı” sıyaqlı sózler tek ǵana jaslar ortasında emes, bálkim, xalqımızdıń barlıq qatlamları arasında milliy uranǵa aylandı.
Berdaq atındaǵı Qaraqalpaq mámleketlik universitetiniń student-jasları da bes baslamanıń tiykarǵı qollap-quwatlawshıları hám belsendileri. Ásirese, bes baslamanıń tórtinshisi – jaslar ortasında kitap oqıwdı hám kitapqumarlıq mádeniyatın arttırıw baǵdarında ámelge asırılıp atırǵan jumıslar maqtanısh etiwge ılayıq.
Sonday ilajlardıń biri, student-jaslardıń arasında ótkeriletuǵın, Qaraqalpaqstan Respublikasınıń ele heshqaysı joqarı oqıw ornında engizilmegen, eń iri joybar – “Eń belsendi kitapqumar topar” tańlawı. Tańlawdıń tiykarǵı maqseti, qaraqalpaq, ózbek hám jáhán ádebiyatı dúrdanaların, shıǵarma avtorlarınıń úlgili dóretiwshilik jolların jaslar ortasında úgit-násiyatlap, olardıń kitap oqıwǵa bolǵan qızıǵıwshılıǵın, eń baslısı, kitapqumarlıq mádeniyatın arttırıw esaplanadı. “Eń belsendi kitapqumar topar” tańlawı hárbir akademiyalıq toplarlar sheńberinde baslanıp, fakultet hám fakultetler aralıq basqıshlar menen dawam etedi. Mine usınıń nátiyjesinde tańlaw búgingi kúnde universitet studentleriniń derlik barlıǵın qamtıp alıwǵa eristi.
Jaslar arasında “Teńles teńleske” degen ideya bar. Bul ideya universitet Málimleme resurs orayı janında, student-jaslardıń baslaması menen shólkemlestirilgen “Kewilli kitapqumarlar” klubında óz kórinisin tapqan. Klub 2017-jıl mart ayınan baslap óz iskerligin baslaǵan bolsa, búginge kúnge shekem jaslardıń mánawiyatın hám kitapqumarlıqqa bolǵan qızıǵıwshılıǵın arttırıw baǵdarında kóplegen ilajlar ámelge asırdı. Búgingi kúnde klub aǵzaları 200 den aslam. Olar universitet kóleminde hár qıylı kitap prezentaciyaların, ádebiy kesheler hám akciyalar shólkemlestirip, ózleriniń alǵan bilimlerin teńlesleri menen bólisedi. “Eń belsendi kitapqumar student”, “Kitapqumarlar” zákawatı, viktorina soraw-juwap oyınları mine usınıń ayqın dáliyli.
Sonday-aq tek ǵana universitet kóleminde emes, al respublika sheńberinde klub aǵzalarınıń belsendiligin kóriwimizge boladı. Atap aytqanda, hár jılı Qaraqalpaqstan Respublikası Arqa-batıs áskeriy okrugında ótkeriletuǵın kitapqumarlıq kesheleri, Qaraqalpaqstan jazıwshılar awqamı, Qaraqalpaq mámleketlik málimleme resurs orayı menen birgelikte hár ayda shólkemlestiriletuǵın ilajlardı mısal etip kórsetiwge boladı. Sonıń menen birge, Xojeli rayonında jaylasqan 1-sanlı mehribanlıq úyi tárbiyalanıwshılarına “Hár balaǵa bir kitap” akciyası ótkerilip, búgingi kúnge shekem mehribanlıq úyi kitapxanasındaǵı kitap teksheleri klub aǵzaları tárepinen 300 den aslam ádebiy kitaplar menen toltırıldı. “Kewilli kitapqumarlar” klubı aǵzaları óziniń qamtıp alıw sheńberin ele de keńeytiw maqsetinde, respublikamızdaǵı rayonlardıń jasları menen de birge islesiwdı jolǵa qoyǵan. Bul bolsa kitapqumarlıq “epidemiyası” nıń tarqalıw dárejesin arttırıwǵa úlken xizmet etedi. Usınday ilajlar hám belsendilik tiykarında klub aǵzaları mámleketimizdiń jámiyetlik-siyasıy turmısında óz ornına iye jaslardıń qatarında turıp, Húrmetli Prezidentimiz baslap bergen iygilikli baslamanı en jaydırıp kelmekte.
Bunday mısallar hám jetiskenlikler Berdaq atındaǵı Qaraqalpaq mámleketlik universitetinde ele kóp tabıladı. Respublikamızdaǵı eń shetki Taxtakópir hám Moynaq rayonlarında “Bes baslama – bes imkaniyat” uranı astında shólkemlestirilgen ilajlardı da jaslardıń mánawiyatın joqarılatıwǵa qaratılǵan iygilikli islerdiń bir kórinisi desek asıra aytqan bolmaymız. Eń baslısı, bul ilajlar usınıń menen toqtap qalmaydı. Universitet administraciyası bes baslamanı en jaydırıwǵa qaratılǵan, arnawlı “Jol kartası”n dúzip, respublikamızdıń barlıq aymaqlarına shekem jetip barıwdı maqset etken.
Juwmaqlastırıp aytqanda, universitet student-jasları teń ǵana kitapqumarlıqta emes, al, kórkem óner tarawında, sportta, ilim-pánde, IT texnologiyalardı rawajlandırıw hám basqa da baǵdarlarda óz belsendiligin kórsetip kelmekte. Demek, mánawiy jetik, intellektual bilim hám kónlikpege iye bolǵan jaslar aramızda júdá kóp. Prezidentimiz alǵa súrgen bes baslı baslama mine usınday jaslardı júzege shıǵarıp qollap-quwatlawǵa hám olardıń sanınıń artıwına úlken jol ashıp beredi.
B.Joldasbaeva,
Qaraqalpaq filologiyasi hám jurnalistika fakultetiniń 3-kurs studenti.
