2020-жыл 14-январда Химия-технология факультети ҳәм Санаат технологиясы факультетлериниң қоспа илимий семинарының биринши мәжлиси болып өтти.
Мәжлиске еки факультеттиң илимий дәрежеге ийе профессор – оқытыўшылары қатнасты. Бул мәжлистиң күн тәртибинде факультетлер тәрепинен 2020-жыл ушын режелестирилген илимий-семинар мәжилиси жумыслары ҳәм олардың орынланыў барысы ҳәм Өзбекстан Республикасы Илимлер академиясы Қарақалпақстан бөлими Қарақалпақ тәбият илимлери илим-изертлеў институты 3-курс таяныш докторанты Хажибаев Қувваттың «Арал теңизи Artemia цисталарының белок-пептид компонентлери тийкарында биоөнимлерди алыў технологиясын ислеп шығыў» темасындағы илимий-изертлеў жумысы бойынша алынған жетискенликлери, илимий жаңалықлары ҳәм әмелиятқа енгизиў жумысларын додаланды.
Илимий семинар мәжилисин илимий семинар баслығы факультет деканы Б.Нурымбетов кирис сөз бенен ашты. Ол өз сөзинде еки факультет қасында шөлкемлестирилген илимий семинардың мақсетин, олардың ағзаларын ҳәм ис-режеси менен семинар қатнасыўшыларын таныстырып өтти.
Илимий семинардың әҳмийети ҳәм Scopus рейтингиндеги илимий журналларға мақала бериўдиң әҳмийети ҳәм тәртиби ҳаққында университеттиң илимий ислер ҳәм илимий педагог кадрларды таярлаў бөлиминиң баслығы К.Нзаматдинов кең түрде түсиник берди.
Сондай ақ, факультет профессор-оқытыўшылары тәрепинен Scopus журналларына илимий мақалалар таярлаў, шет еллер менен бирге ислесиў илажларын кеңейтиў илажлары ҳаққында түсиниклер берилди.
Күн тәртибиндеги екинши мәселе бойынша 3-курс таяныш докторанты Қувват Хажибаев «Арал теңизи Artemia цисталарының белок-пептид компонентлери тийкарында биоөнимлерди алыў технологиясын ислеп шығыў» атамасындағы илимий изертлеў жумысы бойынша алынған жетискенликлери, илимий жаңалықлары ҳәм әмелиятқа ендириў жумыслары ҳаққында семинар қатнасыўшыларын таныстырып өтти ҳәм семинар қатнасыўшылары қызықтырған саўалларға жуўаплар берди.
З.Джуманова,
Химия-технология факультети илимий ислер бойынша декан орынбасары.
