Бүгин Бердақ атындағы Қарақалпақ мәмлекетлик университетинде Өзбекстанның Израиль ҳәм Малайзия мәмлекетиниң елшилери менен ушырасыў болып ѳтти.
Мийманлар университеттиң бас бинасында салтанатлы жағдайда нан, дуз бенен күтип алынды.
Буннан соң келген мийманлар ҳәм университет ректоры А.Реймовтың басшылығында ѳз- ара пикир алысыў болып ѳтти.
Малайзия мәмлекетиниң елшиси Усманов Равшан Аброрович илимди раўажландырыў жолында еки елдиң бирге ислесиўин жолға қойыў, Малайзиядағы Сити университети менен бирге ислесиў, қоспа билимлендириў жойбарын әмелге асырыў бағдарында пикир алысты.
Буннан соң Өзбекстанның Израиль мәмлекетиндеги елшиси Феруза Махмудова Юлдашевна университет ректоры А.Реймов ҳәм университет проректорлары менен ушырасты. Ушырасыў даўамында университет ректоры А.Реймов университет тарийхы ҳәм ҳәзирги ўақытта алып барылып атырған илимий жумыслар ҳаққында мағлыўматлар берип өтти. Ҳәзирде Россия, Белоруссия мәмлекетлери менен биргеликте қоспа билимлендириў дәстүри жолға қойылғанлығын ҳәм келешекте басқа мәмлекетлер менен де усы бойынша жумысларды жолға қойыў нәзерде тутылғанлығын билдирди. Соның менен бир қатарда Израиль мәмлекети менен де еки бағдар бойынша:
1) билимлендириў; 2) илимий изертлеў жумыслары бойынша бирге ислесиўди жолға қойыў бойынша сәўбетлесиўлер жүргизди.
Елши Ф. Махмудова Израиль мәмлекети ҳаққында мағлыўмат берип, ол елдиң өзи ҳәзирги ўақытта кишкене ғана жеринен мийўе, палыз-егинлерин жетистириў бойынша дүньяға белгили екенлигин ҳәм агросектор, суў мәселеси, билимлендириў тараўы, илимий изертлеў жумыслары бойынша бирге ислесиўге мүмкиншилик бар екенлигин айтып өтти.
Бул бойынша ушырасыўдан соң Өзбекстанның Израиль мәмлекетиндеги елшиси Ф. Махмудова Биология факультетинде университет факультетлери деканлары хәм профессор-оқытыўшыларына кеңирек түсиник берип өтти. Бунда Қарақалпақ мәмлекетлик университети келешекте Израиль мәмлекетиниң университети менен бирге ислесиў бойынша жөнелислерин белгилеп алыўды усыныс етти.
Өзбекстанның Израиль мәмлекетиндеги елшиси ѳз сѳзинде, еки елдиң биргеликте илимий жумысларын алып барыўда жақыннан жәрдемин беретуғынлығын ҳәм Израиль менен аўыл хожалығы бойынша жойбарлар дүзип, бирге ислесиўге таяр екенлигин билдирди.
