Usı jıldıń 29-aprel kúni Prezidentimizdiń 2020-jıl 7-maydaǵı PQ-4708 sanlı qararında kórsetilgen “mámleketimizdiń ilimiy hám tálim shólkemlerin basqıshpa-basqısh jáhánniń matematika páni boyınsha jetekshi ilimiy orayları dárejesine jetkiziw” hám qábiletli jaslardı anıqlaw máselelerin ámelge asırıw maqsetinde Qaraqalpaq mámleketlik universiteti Matematika fakulteti professor oqıtıwshıları hám Ózbekstan Respublikası Ilimler Akademiyasınıń V.I.Romanovskiy atındaǵı Matematika institutınıń Qaraqalpaqstan bólimi ilimiy xızmetkerleri tárepinen Nókis qalasındaǵı Prezident mektebiniń 6-10-klass oqıwshıları arasında matematika páninen bilimler sınaǵı ótkerildi. Bilimler sınaǵın ótkiziwden maqset qábiletli oqıwshılardı saylap alıp, olardı matematika páninen ótkeriletuǵın pán olimpiadalarına maqsetli tayarlaw bolıp tabıladı.
Oqıwshılardıń bilim dárejesin bahalap barıw hám bilimler bellesiwiniń ádil túrde ótiwin QMU Matematika fakulteti professor oqıtıwshıları hám Matematika institutınıń ilimiy xızmetkerleri qadaǵalap bardı. Qararǵa muwapıq, “ulıwmalıq orta, orta arnawlı, professional, joqarı oqıw orınları ilimiy shólkemler ortasında jaqın sheriklikti támiyinleytuǵın sistemanı jaratıw” ushın Qaraqalpaq mámleketlik universiteti Matematika fakulteti oqıtıwshıları hám matematika institutı ilimiy xızmetkerleri Nókis qalası Prezident mektebi oqıwshıları arasında qosımsha tayarlıq kursların shólkemlestiriwdi rejelestirmekte.
Aytmuratova Sarbinaz
Matematika fakulteti 3-kurs studenti
