Өзбекстан Республикасы Президенти Ш.М.Мирзиёевтың 2021-жыл 24-август күнги Пәрманына муўапық, елимиздиң экономикалық потенциалын беккемлеў, оның жәҳән көлеминдеги абырайын арттырыў, ўатанымыз абаданлығы, турмысымыздың пәраўанлығын тәмийинлеў бағдарындағы үлкен хызметлери, соңғы жылларда Жаңа Өзбекстанда жеделлик пенен алып барылып атырған түпкиликли реформалар процессиндеги белсендилиги, мәмлекет ҳәм халық мәплерин әмелге асырыў жолындағы пидайы мийнети, ислеп шығарыў ҳәм социаллық-руўҳый тараўлардағы көп жыллық нәтийжели ҳәм үлгили искерлиги, жас әўладты ўатансүйиўшилик, миллий ҳәм улыўма инсаный қәдириятларға ҳүрмет руўҳында тәрбиялаўға қосқан үлкен үлеси ҳәмде социаллық турмыстағы белсенди қатнасы ушын физика-математика илимлериниң докторы, профессор, Өзбекстан Республикасы Илимлер Академиясының академиги, Өзбекстан Республикасы илим ғайраткери, Өзбекстан Республикасы Илим ҳәм техника тараўындағы Биринши дәрежели Мәмлекетлик сыйлықтың лауреаты, Өзбекстан Республикасы Олий Мажлис Сенаты ағзасы ҳәм Өзбекстан Республикасы Илимлер Академиясы В. И. Романовский атындағы Математика институтының директоры Шавкат Абдуллаевич Аюпов «Өзбекстан Қаҳарманы» атағы менен сыйлықланды.
Ш. А. Аюпов – Өзбекстанның илим-пәни, жоқары билимлендириўдиң раўажланыўына үлкен үлес қосқан ҳәм қосып киятырған алым, операторлар алгебралары, квант итималлықлар теориясы ҳәм ассоциативлик емес алгебралар тараўындағы дүнья жүзине танылған заманагөй илимий мектептиң басшысы болып есапланады. Академик Ш.А. Аюпов жемисли илимий ҳәм илимий-шөлкемлестириўшилик искерлигин педагогикалық искерилиги менен де табыслы алып бармақта.
Устаздың Қарақалпақстан Республикасының математика бойынша илимий потенциалына қосып киятырған үлесин айрықша атап өтиў керек. Оның тиккелей басшылығында көплеген илим докторлары ҳәм илим кандидатлары жетилисип шықты. Соның менен бирге, ҳәр жылы Қарақалпақ мәмлекетлик университети Математика факультетиниң зийрек студент жасларына операторлық алгебраның актуал проблемалары бойынша сабақ берип келмекте.
Өзбекстан Қаҳарманы Шавкат Абдуллаевич Аюповқа университетимиз жәмәәти атынан беккем ден-саўлық тилеп қаламыз.
Нуржанов Б. О.
Өзбекстан Республикасы Илимлер Академиясы
В. И. Романовский атындағы Математика
институтының Қарақалпақстан бөлиминиң
үлкен илимий хызметкери.
