Shet tiller fakultetinde ustaz oqıtıwshı, inglis til bilimi kafedrası dotsenti, f.i.k Dilbar Xadjievanıń 60 jasqa tolıwı múnásibeti menen universitet mádeniyat sarayında “Ustazımızǵa tájim ” atamasında ushırasıw bolıp ótti.
Fakultet dekanı Dj.Kurbanbaev shıǵıp sóylep, bárshe professor-oqıtıwshılardı eń ullı, eń áziz bayramlardıń biri “Ustazlar hám muǵallimler” kúni menen qutlıqladı hám kóp jıllardan berli bilimlendiriw tarawına múnásip úles qosıp kiyatırǵan ustaz oqıtıwshı, inglis til bilimi kafedrası dotsenti, f.i.k Dilbar Xadjievanıń 60 jasqa tolǵan yubeley sánesi menen qutlıqlap, jıynalǵanlarǵa húrmetli ustazdıń ómir jolın úlgi sıpatında aytıp ótti:
-Filologiya ilimleriniң kandidati, dotsent D.Xadjiyevanıń ulıwma miynet stajı 43 jıl. Usı lawazımda 1994-jıldan berli islep kelmekte.
D.Xadjiyeva respublikamızda inglis tili qániygelerin tayarlawda hám universitet oqıw protsessin jaqsılawda tabıslı miynet etip, sonıń menen birge lingvistika til bilimin rawajlandırıwǵa óz úlesin qosıp kiyatırǵan filolog ilimpaz.
Ilimpaz 80nen artıq ilimiy miynetler, sonnan 1 monografiya, 10 oqıw qollanba hám 3 oqıw-metodikalıq qollanbalar avtorı, 20 dan artıq ilimiy maqalalar, respublika hám shet el jurnallarında 40tan aslam tezisleri, respublika hám xalıqaralıq ilimiy- ámeliy konferenciya toplamlarında basıp shıǵarılǵan.
Ol jankúyer alım, ustaz oqıtıwshı sıpatında óziniń ustazlıq sheberligi hám ilimiy dóretiwshilik qabileti menen ayrıqsha kózge túsedi. Onıń ilimiy basshılıǵında hár jılı bir neshe student hám magistrantlar ózleriniń qánigelik jumısların tabıslı qorǵap kelmekte.
Ayrıqsha atap aytqanda, tájiriybeli ustaz ózi alıp barǵan ilimiy – metodikalıq izertlewleri nátiyjelerin universitettiń tálim- tárbiya protsessine engizgen pedagog- ilimpaz. Onıń avtorlıǵında basıp shıǵarılǵan “Seminars in Stylistics”, “Translation”,”Developing speaking through writing activities”, “English Stylistics”, “Literary theory”, “History of English literarure” “History of American literature” oqıw qollanbalarınan «Stilistika hám tekst interpretatsiyası», «Jazba awdarma», «Jazba soylew ámeliyatı”, “Inglis ádebiyatı tariyxı” kursların oqıtıwda paydalanılmaqta. Bul ádebiyatlar universitet málimleme resurs orayına jaylastırılǵan.
D.T.Xadjiyeva tiykarǵı isi menen bir qatarda jámiyetlik jumıslarda da belsendilik penen qatnasadı. Ol jaslar arasında tálim-tárbiya máselesine ayrıqsha itibar berip, bir qatar ádebiy kesheler, sáwbetlesiwler, ushırasıwlar hám úgit násiyat jumısların alıp baradı. Ol basqarǵan topardan 1 student qız Zulfiya atındaǵı mámleketlik sıylıǵın alıwǵa miyasar boldı.
3 studenti Nawayı atındaǵı mámleketlik stipendiyaǵa, 4 studenti Berdaq atındaǵı mámleketlik stipendiyaǵa, al, magistratura bólimi lingvistika tálim baǵdarı magistrantı Sarsenbayeva Zoya, Rossiya Federaciyasınıń Penza qalasında ótkerilgen xalıqaralıq konferensiyada ilimiy maqalası menen qatnasıp, 1- orındı iyeledi.
D.Xadjiyeva óziniń insanıylıq paziyleti, pidayılıǵı, miynetkeshligi, joqarı dárejedegi ilimiy hám siyasiy bilimi, shákirtler tayarlawda, sonday-aq, shańaraqta perzent tárbiyasındaǵı úlgili tárepleri menen úlken húrmet hám itibarǵa iye insan ekenligin fakultetimiz dekanı ayrıqsha atap otip, búgingi yubeley jası menen qutlıqlap, en jaqsı tileklerin bildirdi
Bunnan soń inglis tili hám ádebiyatı kafedrası baslıǵı Z. Uteshova, inglis til bilimi kafedrası baslıǵı G.Djoldasovalar shıǵıp sóylep, ustazımız D. Xadjievanı yubeley jası menen qutlıqlap, kafedra professor-oqıtıwshıları tárepinen tayarlanǵan sawǵaların tapsırdı.
Bunnan soń keshe student jaslar tárepinen tayarlanǵan koncert baǵdarlaması menen dawam etti. Keshe mazmunlı, zawıqlı, tásirlerge bay tárizde ótkerildi.
Inglis til bilimi kafedrası baslıǵı G.Djoldasova
