Хабарыңыз бар, Өзбекстан Республикасы Министрлер Кабинетиниң 2021-жыл 6-мартдағы “Өзбекстан Республикасында 2021-жылда ҳалықаралық ҳәм республика шеңберинде өткерилетуғын илимий ҳәм илимий-техникалық илажлар режеси ҳаққында”ғы 78-ф-санлы Бийлигине муўапық 2021-жылдың 26-27-октябрь күнлери Бердақ атындағы Қарақалпақ мәмлекетлик университетинде “Заманагөй географиялық изертлеўлерде аймақлардыӊ социаллық-экономикалық раўажланыўы, тәбияттан ақылға сай пайдаланыў ҳәм туризм мәселелери” атамасында халықаралық илимий-әмелий конференциясы өткерилиўи ҳаққында ғалаба хабар қуралларында дағаза жәрияланған еди.
Мине усы халықаралық конференцияға қатнасыў нийетин билдирген сырт еллердеги бир қатар жоқары оқыў орынлары хәмде илимий изертлеў мекемелериниң алымлары ҳәм профессор-оқытыўшыларынан ибарат бир қатар делегациялар елимизге, соның ишинде, Қарақалпақ мәмлекетлик университетине илимий сапар менен келди.
Усындай илимий сапар менен университетимизге Москва мәмлекетлик халық аралық байланыслар институты жәҳән экономикасы кафедрасы профессоры, география илимлери докторы, профессор Горбанёв Владимир Афанасьевич, Алтай мәмлекетлик университети шет тиллери кафедрасы доценти, педагогика илимлери кандидаты, доцент Скубневская Татьяна Валентиновна (Россия), Абай атындағы Қазақ мәмлекетлик педагогика университети география кафедрасы докторанты Демеуов Арман Болатович (Қазақстан), С.Айни атындағы Тәжикистан мәмлекетлик педагогика университети география ҳәм туризмди оқытыў методикасы кафедрасы профессоры, география илимлери докторы, профессор Мухаббатов Холназар Мухаббатович, усы университеттиң физикалық география кафедрасы профессоры, география илимлери докторы, профессор Муртазаев Уктам Исматович, усы университеттиң география ҳәм туризмди оқытыў методикасы кафедрасы баслығы, география илимлери кандидаты, доцент Самиев Амруддин Мухаммадиевич, академик Б.Гафуров атындағы Хожанд мәмлекетлик университетиниң физикалық география кафедрасы доценти, география илимлери кандидаты, доцент Турдиев Турди Мулладжанович (Тәжикистан) университетимизде мийманда болды.
Келген конференция қатнасыўшыларын Қарақалпақ мәмлекетлик университети илимий ислер ҳәм инновациялар бойынша проректоры, география илимлери докторы, доцент И.Р.Турдымамбетов, география ҳәм тәбиий ресурслар факультети деканы, география илимлери кандидаты, доцент Н.Ембергенов, тәбиий география кафедрасы баслығы, география илимлери кандидаты, доцент К.Алланазаровлар күтип алып, мийманларды елимизге, тиккелей конференция жумысында қатнасыў ушын келген илимий сапары менен қызғын қутлықлады ҳәм тийисли жоқары окыў орынлары менен бүгинги күндеги илимий искерлик ҳәм илимий-педагогикалық бағдардағы өз-ара байланыслар ҳаққында кең түрде сәўбетлесиўлер алып барды.
Конференция жумысына қатнасыў ушын келген мийманлар да өз гезегинде университет басшылығы хәм мийнет жәмәәтине көрсетилген айрықша итибар ҳәмде миймандослық ушын үлкен миннетдаршылықларын билдирди.
Конференция ертең 26-октябрь күни университеттиң руўхыйлық мәжилислер залында басланыўы күтилмекте.
ҚМУ Баспасөз хызмети
