Berdaq atındaǵı Qaraqalpaq mámleketlik universiteti rektorı Reymov Axmed Yaponiyanıń Aichi prefekturası universiteti vitse-prezidenti Xiroaki Kavabatanı qabılladı.

Universitet rektorı  Axmed Reymov bul ushırasıwdı birge islesiwde qoyılıp atırǵan dáslepki qádem sıpatında joqarı bahaladı.

Ushırasıwda Qaraqalpaq mámleketlik universiteti fakultetleri turmısı, Shet tiller fakultetinde házirgi kúnde yapon tilin úyreniw baǵdarında islenip atırǵan jumıslar, xalıqaralıq baylanıslar  boyınsha alıp barılıp atırǵan isler haqqında Xiroaki Kavobataǵa maǵlıwmatlar berip ótildi.

Sáwbetlesiw dawamında  universitet rektorı tárepinen Xiroaki Kavabata wákilliginde eki universitet ortasında birge islesiw memorandın dúziw, qospa tálim baǵdarlamasın engiziw, ekonomika, tábiyiy pánler, filologiya baǵdarında studentler akademiyalıq almasıwlardı ámelge asırıw usınısları bildirildi.

Miyman universitettegi studentlerdiń yapon tilin úyreniwge bolǵan qızıǵıwshılıqlarınan kelip shıǵıp,  tek Qaraqalpaq jasları yapon tilin úyrenip qoymastan, Yaponiya studentleri de qaraqalpaq  tilin, mádeniyatın úyrense dep oylayman, degen usınısların bildirdi.

Ushırasıw sońında eki tárep ushın paydalı bolǵan baǵdarlarda birge islesiw baylanısların keńeytiwge hám olardı ámelge asırıw ushın barlıq ilajlardı kóriwge kelisip alındı.

 Universitet rektorı  A.Reymov miymanǵa universitet atınan Qaraqalpaqstan taryixı haqqında maǵlıwmat beretuǵın estelik sawǵaların tapsırdı.

Ushırasıw dawamında Xiroaki Kavabata universitettiń Shet tilleri fakultetinde yapon tilin úyreniw barısındaǵı isler menen tanıstı.

Qaraqalpaq mámleketlik universiteti Baspasóz xızmeti