Abıroylı shet el joqarı oqıw orınları, ilimiy institutları menen birge islesiwdi kúsheytiw, zamanogóy shet el texnologiyaların elimizge alıp kiriwge, tájriybe almasıwǵa úlken járdem beredi. Kórsetilgen ilajlardı ámelge asırıw maqsetinde Qaraqalpaq mámleketlik universiteti Belarus Respublikası Milliy Ilimler Akademiyası, Belorussiya universiteti hám Rossiya mámleketiniń Belgorod mámleketlik texnikalıq universiteti hám bir qatar ilimiy shólkemleri menen qısqa múddetli ilimiy stajirovkalardı ámelge asırıw maqsetinde shártnamalar dúzdi.
Ximiya-texnologiya fakulteti dekanı Nurımbetov Baxtiyar Ózbekstan Respublikası Innovaciya rawajlanıw Ministrligi tárepinen sırt el ilimiy shólkemlerinde ilimiy stajirovkalardan ótiw boyınsha jas alımlar arasında ótkerilgen konkursta jeńimpaz bolıp Rossiya Federaciyasınıń V.G. Shuxov atındaǵı Belgorod mámleketlik texnikalıq universitetinde 2021-jıldıń oktyabr ayınıń 4 sánesinen baslap eki aylıq stajirovkasın ótip atır. Ol jerde B. Nurımbetov «Cement hám kompozicion materiallar texnologiyası» kafedrasında texnika ilimleri doktorı, professor Ivan Nikolaevich Borisov basshılıǵında «Qaraqalpaqstan Respublikası mergelleri tiykarında kompozicion biriktiriwshilerdi alıwdıń texnologiyasın islep shıǵıw, quramı hám dúzilisin úyreniw» temasındagı ilimiy jumısların alıp barmaqta.
Sonday-aq, «Fizikalıq hám kolloidlıq ximiya» kafedrası docenti, ximiya ilimleriniń kandidatı Amanbay Pirniyazov Ózbekstan Respublikası Innovaciya rawajlanıw Ministrligi tárepinen sırt el ilim-izertlew oraylarında ilimiy stajirovka ótew ushın jas alımlar arasında ótkerilgen konkursta jeńimpaz bolıp, Belarus Respublikası Milliy Ilimler Akademiyasınıń eki ilim orayı: bioorganikalıq ximiya hám milliy botanika baǵında 2021-jıldıń oktyabr ayınıń 4 sánesinen baslap eki aylıq stajirovkasın ótep atır.
Óziniń tiykarǵı ilimiy jónelisi, yaǵnıy tábiyiy polifenol-proantocianidin birikpeleri bolǵan ósimlik dereklerin ximiyalıq úyreniwdi ámelge asırmaqta. Belarus Milliy Ilimler Akademiyasınıń kórnekli alımı, «Ósimlikler biotexnologiyası hám bioximiyası bólimi» baslıǵı, akademik Vladimir Nikolaevich Reshetnikov basshılıǵında Ózbekstan hám Belarus territoriyasında jetistiriletuǵın tiykarınan qızıl reńli sort júzimlerdiń dáneshelerindegi polifenol birikpeleriniń muǵdarlıq hám ximiyalıq qurılısı ózshgesheligin úyreniw ótkermekte.
Belarus MIA Bioorganikalıq ximiya ilim-izertlew institutınıń «Belok injeneriya laboratoriya» bazasında ósimlik obektinen ajıratılǵan polifenol birikpelerin zamanagóy Agilent 1290 HPLC + 6550 iFunnel Q-TOF LC/MS úskenesinde birikpelerdi bir-birinen ajıratıp hám ajıratıp alınǵan birikpelerdiń ximiyalıq qurılısın hám muǵdarın anıqlawdı ámelge asırıp atır.
Bunday shet el joqarı oqıw orınları hám ilimiy oraylarında tájiriybe almasıwda professor-oqıtıwshılardıń qatnasıwı jaqın keleshekte joqarı tálim sapasın asırıwda óz nátiyjesin beriwine isenim bildiremiz.
Fizikalıq hám kolloidlıq ximiya
kafedrası docenti Z.Uzakbergenova
