Búgin Qaraqalpaq mámleketlik universitetinde Ukraina ilimler akademiyasınıń akademigi, Xalıqaralıq ekonomika kafedrası professorı Vladimir Vasilevich Kulishov hám M. V. Lomonosov atındaǵı Moskva mámleketlik universiteti filialı direktorı orınbasarı, ulıwma gumanitar pánler kafedrası baslıǵı, ekonomika ilimleri kandidatı Mamanazarov Abduxakim Bazarovich penen ushırasıw bolıp ótti.
Ushırasıwda universitet ilimiy isler hám innovaciyalar boyınnsh prorektorı I.Turdımambetov Qaraqalpaq mámleketlik universiteti turmısı, xalıqaralıq baylanıslar boyınsha alıp barılıp atırǵan isler haqqında miymanlarǵa maǵlıwmatlar berip ótti.
Sáwbetlesiw dawamında bul eki universitet penen birge islesiw memorandumın dúziw, qospa tálim baǵdarlamasın engiziw, ekonomika, ulıwma gumanitar pánler baǵdarında birge islesiw, studentler akademiyalıq almasıwlardı ámelge asırıw usınısları bildirildi.
Ushırasıw sońında eki tárep ushın paydalı bolǵan baǵdarlarda birge islesiw baylanısların keńeytiwge hám olardı ámelge asırıw ushın barlıq ilajlardı kóriwge kelisip alındı.
Bul ushırasıwdı eki tárep wákilleri de birge islesiwde qoyılıp atırǵan isenimli qádem sıpatında joqarı bahaladı.
Ushırasıwdan soń professor universitettiń ekonomika fakulteti oqıtıwshıları menen studentlerine lekciya sabaǵın ótti.
Qaraqalpaq mámleketlik universiteti Baspasóz xızmeti
