Búgin, 30 -noyabr kúni Berdaq atındaǵı Qaraqalpaq mámleketlik universitetinde Joqarı hám orta arnawlı bilimlendiriw ministriniń pán hám innovatsiyalar boyınsha orınbasarı Raximjon Rasuljonovich Xakimovtıń basshılıǵında Qaraqalpaqstandaǵı joqarı oqıw orınları rektorları, filial direktorları hám oqıw orınları prorektorlarınıń qatnasında ushırasıw bolıp ótti.
Ushırasıwda búgingi kúnde student jaslargʼa jaratılıp atırgʼan imkaniyatlar, olardıń jasaw sharayatları hám mashqalaların sheshiw máselelerinde Qaraqalpaqstandaǵı joqarı oqıw orınlarında islenip atırgʼan jumıslar hár bir oqıw dárgayı mısalında talqılanıp, úyrenildi.
Joqarı oqıw orınlarında bes áhmiyetli baslama sheńberinde islenip atırgʼan jumıslar boyınsha maǵlıwmatlar tıńlandı. Oqıw dárgaylarında student jaslar ushın shólkemlestirilgen dógerekler menen hár qıylı baǵdardaǵı klublarǵa qamtıp alıw dárejesi úyrenilip, olardıń ele de sanın kóbeytiw hám qamtıw kórsetkishin joqarılatıw, jaslarımızdıń waqtın biykar ótkermewi ushın hár qanday sharayatlar jaratıp beriw, sonday-aq, studentlerdiń oqıw ornındaǵı tártip-qaǵıydalarǵa boysınıwı hám kiyiniw mádeniyatı máseleleri boyınsha pikir alıstı.
Joqarı oqıw orınlarındaǵı Komplayens qadaǵalaw sistemasın basqarıw bólimlerinde alıp barılıp atırǵan jumıslar, sonday-aq, korrupciyanıń aldın alıw barısında isleniwi kerek wazıypalar boyınsha maǵlıwmatlar berildi. Usı tarawda islep atırǵan xızmetkerler menen dúzilgen miynet shártnamalarında korrupciyaǵa qarsı gúresiw hám onıń aldın alıw boyınsha májbúriyatlar belgilenip qoyılǵanlıǵı boyınsha túsinik berip ótildi.
Hár bir joqarı oqıw orınlarınıń basshıları student-jaslar menen ashıq sáwbetlesiwler alıp barıp, olardı qıynap atırgʼan mashqala hám pikirlerin tıńlawı boyınsha kerekli kórsetpeler berildi.
Ministr orınbasarı Raximjon Rasuljonovish Xakimov universitet studentleri turar ùyındegı studentler ushın jaratılģan sharayatlar menen tanıstı.
Qaraqalpaq mámleketlik universiteti Baspasóz xızmeti.
