“JETRO” Япония сыртқы саўданы раўажландырыў шөлкеминиӊ директоры Дзюн Такахаси Бердақ атындағы Қарақалпақ мәмлекетлик университетинде мийманда болды.
2021-жылдың май айында Өзбекстан Инвестициялар ҳәм сыртқы саўда министрлиги ҳәм “JETRO” Япония сыртқы саўданы раўажландырыў шөлкеми менен бирге ислесиў бойынша меморандум дүзилген еди. Бунда ҳәр бир аймақтың өзине сай өзгешеликлерин есапқа алған жағдайда, Өзбекстанның инвестициялық қуўаты ҳәм мәмлекетте бизнес жүргизиў ушын енгизилген мүмкиншиликлерди кең жарытыў мақсетинде Японияның исбилермен орталығы ушын барлық аймақларда ҳәр айда бизнес-семинарлар өткериў нәзерде тутылған. Сонлықтан да семинар 2022-жылдың 3-февраль сәнесинде Қарақалпақстан Республикасы менен Хорезм ўәлаятында болып өтиўи режелестирилген.
Мағлыўмат ушын: Өзбекстанда “JETRO”ның ўәкилханасы 2000- жылдан бери жумыс ислеп келмекте. Оның тийкарғы ўазыйпалары Япония компанияларынан мәмлекет экономикасына туўрыдан-туўры инвестицияларды енгизиў, еки мәмлекет санаат кәрханалары ортасында бирге ислесиўди кеңейттириў ҳәм алдыңғы технологиялар менен алмасыўды шөлкемлестириўден ибарат.
Қарақалпақ мәмлекетлик университети Қарақалпақстанда қәнигелерди таярлап бериўде бирден- бир таяншы оқыў орны болып есапланады. Сонлықтан да Дзюн Такахаси Қарақалпақстандағы қәнигелер потенциалын үйрениў мақсетинде университетте болды.
Мийманға университеттиӊ илимий ислер ҳәм инновациялар бойынша проректоры И. Турдымамбетов Қарақалпақ мәмлекетлик университети искерлиги, факультетлер ҳәм бул окыӯ орнында ири өндирис ҳәм санаат кәрханалары ушын таярланатуғын қәнигеликлер ҳаққында мағлыӯмат берип өтти.
Ушырасыӯда Дзюн Такахаси оқыў орнына келгендеги мақсетине тоқтап өтип, Қарақалпақстан аймағына инвестиция киргизиӯде еӊ дәслеп бул жерде жетик қәнигелердиң зәрүрлигин атап өтти.
Мийман Қарақалпақ мәмлекетлик университети ҳаққында унамлы пикирге ийе болып, келешекте бирге ислесиӯ идеясын алға сүрди.
Қарақалпақ мәмлекетлик университети Япония бизнесин қоллап-қуӯатлаӯға ҳәм усы ушырасыўда сөз етилген мәселелер бойынша жақсы мүмкиншиликлер жаратып бериўге таяр екенлигин билдирди.
Қарақалпақ мәмлекетлик университети Баспасөз хызмети
