JANAJAN FAKULTETIMIZDI SAǴÍNDÍQ

Pútkil dúnyanı lárzege salǵan koronavirus pandemiyası barlıq tarawlar qatarında bilimlendiriw sistemasinada óziniń tásirin ótkerdi desek qátelespeymiz. Koronavirustıń jańa «Omicron» shtambı tarqalıwınıń aldın alıw hám kesellikler sanın azaytıw maqsetinde usı jıldıń 24-yanvar sánesinen baslap respublikamızdaǵı bárshe MShBSh, mekteplerde hám JOO da sol qaratı Berdaq atındaǵı Qaraqalpaq mámleketlik universitetinde de oqıw online tárizde baslandı. Házirgi kúnde Qaraqalpaq hám jurnalistika fakultetindegi ustazlarımız bizlerge «Zoom» platforması arqalı online sabaqlardı ótip atır. Bul álbette alıs rayonlarda turatuǵın studentler ushın bir qansha qolaysızlıqlar tuwdıradı. Sebebi bazi bir rayonlarda, alıs awıllarda internet tezligi házirge shekem mashqala bolıp qalmaqta. Soǵan qaramay barlıq studentler sabaqlarǵa belsene qatnasıwǵa háreket etip atır.

Online sabaqlar bolıwına qaramastan ustazlarımızda bizlerge sapalı bilim bermekte. Álbette bunıń ushın ustazlarımızǵa óz minnetdarshılıǵımızdı bildiremiz hám tez arada biz jáne janajan universitetimizde dástúriy oqıwdı baslaymız degen úmittemiz.