Joqarı oqıw orınlarınıń bilimlendiriwdiń basqa da buwınları menen tıǵız baylanıs ornatıwı tálim-tárbiyada sistemalılıqtı hám nátiyjelilikti arttırıwǵa túrtki bolmaqta. Ásirese, ulıwma bilim beriw mektebi oqıwshıların joqarı oqıw orınlarına qamtıp alıw dárejesin arttırıw boyınsha Prezidentimiz tárepinen anıq wazıypalar belgilep berilgen. Sonlıqtan mektep hám joqarı oqıw orınlarınıń ortasında úzliksiz, tálim-tárbiyalıq baylanıs ornatıldı.
Universitetimizdiń Qaraqalpaq filologiyası hám jurnalistika fakulteti de bul baǵdardaǵı jumıslarda belsendi. Fakultettiń “Qaraqalpaq ádebiyatı” kafedrası oqıtıwshısı, Ózbekstanǵa xızmet kórsetken mádeniyat xızmetkeri, f.i.k., docent B.Genjemuratov basshılıǵında, paytaxtımızdaǵı I.Yusupov atındaǵı qánigelestirilgen mektep oqıwshıları menen birgelikte universitet boylap sayahat shólkemlestirildi. Bunnan gózlengen tiykarǵı maqset – oqıwshılardıń joqarı oqıw ornında oqıwǵa, ádebiyat hám jurnalistikaǵa bolǵan qızıǵıwshılıǵın arttırıw, universitet iskerligi hám studentlerge jaratılǵan imkaniyatlar menen tanıstırıw bolıp tabıladı. Eń dáslep, oqıwshılar universitetimizdiń Málimleme-resurs orayın barıp kórdi.
Orayda shólkemlestirilgen kórkem ádebiyatlar, elektron ádebiyatlar, gazeta-jurnal hám ilimiy miynetler bólimlerinde bolıp, studentler ushın barlıq imkaniyatlar jaratılǵanlıǵınıń gúwası boldı. Olar B.Genjemuratovtan kórkem hám ilimiy ádebiyatlar, ilimiy iskerlik haqqında bahalı bilimlerge iye boldı. Málimleme-resurs orayı xızmetkerlerine ózleriniń qızıqtırǵan sorawların berip, tiyisli juwapları aldı. Sonday-aq mektep oqıwshıları Qaraqalpaq filologiyası hám jurnalistika fakultetinde de miymanda boldı. Bul jerdegi oqıw processi, fakultet studentleriniń jetiskenlikleri menen jaqınnan tanıstı.
Jurnalistika baǵdarı studentleriniń teoriya hám ámeliyattı birge alıp barıwı ushın shólkemlestirilgen Media oraydaǵı zamanagóy texnikalar, ilimiy ádebiyatlar haqqında maǵlıwmatlarǵa iye boldı. Shayır B.Genjemuratov respublikamızda jaslar ushın jaratılǵan imkaniyatlardıń áhmiyeti joqarı ekenligi, jaslar bul bekkem isenimdi hám itibardı óz jetiskenlikleri, bilimi menen aqlawı kerekligi haqqında aqıl-keńeslerin berdi. Mektep oqıwshıları da universitet studenti bolıwǵa degen ıqlası ele de artqanlıǵın jasırmadı. Biri ádebiyattanıwshı, biri lingvist bolaman dese, jáne birewleri jurnalist bolsam deydi. Oqıwshılar bunday sayahattan ózlerine bir álem quwanısh, bilim hám bir ómirlik tájiriybe aldı. Keleshektegi maqsetlerin anıq belgilep aldı.
Álbette, shın ıqlas hám háwes úlken maqsetlerdi belgileydi. Durıs tálim-tárbiya hám qollap-quwatlawlar bolsa maqsetke jetkeredi. I.Yusupov atındaǵı qánigelestirilgen mektep oqıwshıları da biyik shıńlardı gózlep, háreketti búginnen baslasa tájip emes.
QMU magistrantı
B.Joldasbaeva
