Usı jıldıń 5-mart kúni universitetimizdiń ruwxıylıq zalında shayıra, awdarmashı Gúlistan Matyaqupovanıń jańadan jarıq kórgen «Ko’ksimdagi nur» kitabınıń prezentaciyası hám «Maqtumqulı qosıqlarınıń II tomlıǵı» ózbek tiline awdarǵan kitabı menen jaqınnan tanısıw keshesi bolıp ótti.

     Keshede Qaraqalpaqstan Jazıwshılar awqamı baslıǵı Keńesbay Karimov, «Ámiwdárya» jurnalı bas redaktorı orınbasarı Nábiyra Tóreshova, Qaraqalpaqstan xalıq jazıwshısı, «Bilim» baspası direktorı Muratbay Nızanov, «Qaraqalpaqstan tańı» gazetasınıń bas redaktorı Náziyra Matyaqupova, Ájiniyaz atındaǵı Nókis mámleketlik pedagogika institutı professorı Kárimbay Qurbanbaev, professor – oqıtıwshılar, magistrantlar hám «Kitapqumarlar» klubı aǵzaları qatnastı.

Ushırasıw keshesine kelgen miymanlar hám student jaslar G.Matyaqupovanıń jańadan jarıq kórgen «Ko’ksimdagi nur» kitabınıń prezentaciyasın tıńladı hám «Maqtumqulı qosıqlarınıń II tomlıǵı» ózbek tiline awdarılǵan kitabı menen jaqınnan tanıstı. Maqtumqulıday shayırdıń qosıqları ózbek tiline awdarma isleniwi, álbette, jaslarımızǵa Maqtumqulı dóretiwshiligi menen ele de jaqınnan tanısıwǵa keń imkaniyat jaratadı. Ádebiy keshe sońında Gúlistan Matyaqupovanıń kitapları universitet Málimleme-resurs orayına sawǵa etildi.

     Ushırasıw barısında qatnasıwshılar hám student jaslar miymanlarǵa olardıń ómiri hám dóretiwshiligi haqqında qızıqqan sorawların berdi hám ózlerine tiyisli juwaplar aldı.

Shayır hám jazıwshılar menen usınday ushırasıwlardıń tez-tezden shólkemlestiriliwi, kitap prezentaciyalarınıń ótkeriliwi jaslardıń ádebiyatqa bolǵan qızıǵıwshılıǵın ele de arttıradı.

Abdullaeva Shaxnoza-Banu

Qaraqalpaq filologiyası hám jurnalistika fakulteti 1-kurs studenti,

«Kitapqumarlar» klubı aǵzası