Ózbekstan hám Túrkiya birge islesiwiniń rawajlanɪwɪnda jańa dáwir baslanɪp atɪrgʼan búgingidey bir payɪtta Qaraqalpaq mámleketlik universiteti rektorɪ, professor A.Reymov basshɪlɪǵɪndaǵɪ delegaciya wákilleri Túrkɪyanɪṅ Izmir qalasɪnda jaylasqan Ege universitetine xɪzmet saparɪnda bolmaqta.
Xabarɪńɪz bar, Ózbekstan Respublikasɪ Prezidenti Shavkat Mirziyoevtiń mirát etiwine bola 29-mart kúni Túrkiya Respublikasɪ Prezidenti Rejep Tayyip Erdoǵan rásmiy sapar menen mámleketimizge keldi.
Túrkiya jetekshisi mámleketimiz basshɪsɪ menen Ózbekstan hám Túrkiya arasɪndagʼɪ óz-ara húrmet, doslɪq hám isenimge tiykarlanǵan kóp qɪrlɪ birge islesiwdi bunnan bɪlay da rawajlandɪrɪw hám bekkemlew boyɪnsha pikir alɪstɪ.
Ózbekstan hám Túrkiya arasɪndaǵɪ birge islesiwdegi ullɪ baslamalardɪń bir kórinisi Qaraqalpaq mámleketlik universitetinde haqɪyqɪy is júzinde tastɪyǵɪn tappaqta.
Berdaq atɪndaǵɪ Qaraqalpaq mámleketlik universiteti delegaciyasɪ Ege universitetindegi Túrkiy xalɪqlar dúniyasɪ ilimiy –izertlew institutɪnda xɪzmet saparɪ menen boldɪ. Bul institut ilimiy-izertlew ortalɪǵɪ bolǵanlɪǵɪ sebepli, ol jerde magistrantlar menen PhD doktorantlarɪ bilim aladɪ. Institutda túrkiy xalɪqlardɪṅ filologiyasɪ, tili, folklorɪ, ádebiyattanɪwɪ, siyasiy bilimleri, tariyxɪ, etnografiyasɪ boyɪnsha ilimiy – izertlew jumɪslarɪ alɪp barɪladɪ. Eṅ áhmiyetlisi, institutda qaraqalpaq ádebiyatɪ menen folklorɪ da belgili ilimpazlar tárepinen izertlenip atɪr.
Ushɪrasɪwda Qaraqalpaq mámleketlik universiteti rektorɪ, professor Axmed Reymov penen Túrkiy xalɪqlar dúniyasɪ institutɪ direktorɪ, professor Nadim Majit ortasɪnda birge islesiw máselesi boyɪnsha sáwbetlesiw bolɪp ȯttɪ. Bul institutta biziṅ universitetimizdegi qaraqalpaq filologiyasɪ hám jurnalistika fakulteti, ȯzbek filologiyasɪ fakulteti, tariyx fakultetleriniṅ professor-oqɪtɪwshɪlarɪ tájiriybe almasɪw, ilimiy-izertlew jumislarɪn alɪp barɪw múmkinshilikleri barɪ atap ȯtildɪ. Usɪ atɪ atalǵan qániygeliklerde bilim alɪp atɪrǵan magistrantlar menen doktorantlar da ilimiy-izertlew jumɪslarɪn Túrkiy xalɪqlar dúniyasɪ institut alɪmlarɪ menen birgelikte dawam ettiriw imkaniyatlarɪ atap ȯtildɪ.
B.Paluanov,
QMU, jurnalistika kafedrasɪnɪṅ docenti
