Berdaq atındaǵı Qaraqalpaq mámleketlik universitetinde «HÁR KÚNIŃIZ NAWRÍZ BOLSÍN» atamasındaǵı milliy bayram tamashaları bolıp ótti.
31-mart. Universitet bas imaratı aldı bayramǵa say bezetilgen. Nawrızǵa say dástúrlerimiz hár bir fakultet jámááti tárepinen birin-biri tákirarlamaytuǵınday etip tayarlanǵan. Kórgizbelerde milliy taǵamlar menen milliy buyımlar, hár qıylı qol óneri úlgileri orın alǵan.
Milliy nama ırǵaqları jańlap, bayram baslanıp atırǵanınan dárek beredi.
Tiykarǵı saxna hár qıylı kórinisler menen jáne de gózzallandırıp, bayram miymanları ushın jaylastırılǵan ǵaz qatar otırǵıshlar óz iyelerin kútedi. Bul jerge ilim, mádeniyat, kórkem óner ǵayratkerleri, túrli taraw wákilleri, nuraniy aǵa-apalar, universitetimiz professor-oqıtıwshıları, student jaslar kelgen. Qádirdanlıqtı, húrmet-izzetti tastırıp jiberetuǵın diydarlasıwlar Nawrızdıń keńpeyillik hám jaqsılıq tımsalı ekenin dálillep beredi.
Bayram saltanatında Berdaq atındaǵı Qaraqalpaq mámleketlik universiteti rektorı, professor Axmed Reymov bársheni bayram nenen qutlıqladı.
Rektor óz qutlıqlawında Nawrızdń mazmun-mánisi, elimizdegi tınıshlıqtıń qádirine ayırıqsha toqtap ótti:
— Usınday bir quwanıhlı demlerde, qutlı bayram kúnlerinde jámáátimiz jetiskenlikleri haqqında toqtap ótetuǵın bolsaq, búgingi kúnde universitetimizde zamanagóy bilim hám ilim sırların tereń iyelep, biyǵárez pikirleytuǵın, óz Аna jurtına mehir hám sadıqlıq tuyǵısı menen jasaytuǵın jańa áwladtı tárbiyalaw jumısları talap dárejesine tolıq juwap beredi dep, isenimli túrde ayta alamız.
Óytkeni, student-jaslarımız arasınan usı oqıw jılınıń ózinde 2 Prezident stipendiantı, 1 Zulfiya atındaǵı mámleketlik sıylıǵı, 3 Beruniy, 4 Nawayı, 1 Uluǵbek, 1 Islam Karimov atındaǵı, 14 Berdaq atındaǵı jáne de 2 studentimiz Tólepbergen Qayıpbergenov hám Ibrayım Yusupov atındaǵı jańadan shólkemlestirilgen mámleketlik stipendiya jeńimpazlarınıń shıqqanı, sonday-aq, 2 Jáhán, 5 Аziya, 19 Ózbekstan chempionları hám basqa da kóplegen sport jarıslarınıń jeńimpazları jetisip shıqqanı menen maqtanısh etsek arzıydı.
Sonıń menen birge, bıyılǵı jılı 1 studentimiz «Shuhrat» medalı menen sıylıqlanıp kewillerimizdi quwanıshqa bóledi, -dep atap ótti universitetimiz jetiskenliklerin.
Universitettiń bas imaratı aldı báhár gúlleri menen búrkenip, gózzallıqtan lipas jamılǵan. Tábiyat oyandı. Nawrızdıń janǵa jaǵımlı naması shalınıp, milliy kiyimleri menen átirapqa sán-saltanat bergen universitet jasları bir ananıń perzentlerindey bekkem awızbirshilik penen bul qutlı dárgaydıń úlken toyın abıraylı ótkeriwge at salıstı.
Bayram ilajı úlken koncert baǵdarlaması menen dawam etti. Talantlı studentler tárepinen milliy úrp-ádet, dástúrler, qosıqlar, ayaq-oyınlar atqarılıp, milletler aralıq tatıwlıqtı jırlaytuǵın qaraqalpaqsha, ózbekshe, qazaqsha, túrkmenshe, russha qosıqlar atqarıldı hám jıynalǵanlarǵa bayram keypiyatın inám etti.
Bayramnıń sáni bolǵan aq otawlar tigildi. Sıpalardaǵı dasturxanlarǵa báhár taǵamları tartılǵan. Student jaslarımızdıń xalıq qosıqları menen oyınlardı kámine keltirip atqarıwı, jaslıqqa tán oyın-kúlkisi Nawrızdıń milliylikten saǵa alǵanın kórsetip turadı.
Talantlı studentler tárepinen milliy úrp-ádet, dástúrler, qosıqlar, ayaq-oyınlar atqarılıp, milletler aralıq tatıwlıqtı jırlaytuǵın qaraqalpaqsha, ózbekshe, qazaqsha, túrkmenshe, russha qosıqlar atqarıldı hám jıynalǵanlarǵa bayram keypiyatın inám etti.
Ózbekstan hám Qaraqalpaqstan Respublikalarına xızmet kórsetken artist E.Аytmuratova hám Qaraqalpaqstan Respublikasыıa xızmet kórsetken artist D.Xojabergenov, Qaraqalpaqstanǵa xızmet kórsetken artist D.Mámbetmuratovlardıń atqarıwındaǵı qosıqlar bayramǵa payız berdi.
Universitettiń Hurliman» xalıq ansambli, Kórkem óner fakultetiniń talantlı student jasları óz ónerleri menen, universitet «Jayxun» quwnaqlar hám ziyrekler toparı óziniń bayram házilleri menen qatnastı.
Qaraqalpaq mámleketlik universiteti studentleriniń kiyiniw mádeniyatı baǵdarında, “Biziń maqtanıshımız” ataması menen Dene mádeniyatı fakulteti studentleriniń kórgizbeli shıǵıwları bayram saltanatında ózgeshe zawıq baǵıhladı.
Bayram tamashaları jáne de dawam etti…
QMU Baspasóz xızmeti
