Búgin, 1-aprel kúni Berdaq atındaǵı Qaraqalpaq mámleketlik universitetinde Qaraqalpaqstan Respublikası Konstituciyasınıń qabıl etilgenine 29 jıl tolıwına arnalǵan ushırasıw bolıp ótti.
Ilajǵa Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov, Qaraqalpaqstan Respublikası Ádillik ministri S. Mambetkadırov, Qaraqalpaqstan Respublikası sudı baslıǵınıń orınbasarı K.Tariyxov hám universitettiń professor-oqıtıwshıları, student-jaslar qatnastı.
Konferenciya mámleketlik gimnler atqarılıwı menen baslandı.
Ilajdı Qaraqalpaq mámleketlik universiteti rektorı, professor А.Reymov kiris sózi menen ashıp berdi.
—Konstituciyamızda búgingi hám keleshek áwladlar aldındaǵı joqarı juwapkershilikti názerde tutıwshı normalar belgilep qoyılǵan. Bul konstituciyaliq normalar búgingi hám erteńgi áwlad wákilleriniń huqıq hám mápleriniń óz kórinisin tapqanlıǵın kórsetedi.
Konstituciya bul shın mánisinde jaslarǵa tiyisli mámleket siyasatınıń huqıqıy tayanıshı esaplanadı,- dep atap ótti rektor А.Reymov Konstituciyanıń jaslar turmısındaǵı tutqan áhmiyeti haqqında.
Аtap ótilgenindey, Konstituciya – hár bir mámlekettiń tariyxı, búgingi kúni hám keleshegin, xalıqtıń erk-ıqrarın ózinde sáwlelendiriwshi tiykarǵı nızam bolıp esaplanadı.
Qaraqalpaqstan Respublikasınıń Konstituciyası 1993-jıl 9-aprel kúni on ekinshi shaqırıq Qaraqalpaqstan Respublikası Joqarǵı Sovetiniń on ekinshi sessiyasında qabıl etilgen.
Qaraqalpaqstan Respublikasınıń Konstituciyası alǵı sóz, 6 bólim, 26 bap, 121 statyadan ibarat.
Konstituciyamızdıń hár bir statyası insan ushın, onıń materiallıq hám ruwxıy talap hám mútájliklerin, máplerin qanaatlandırıw ushın, xalqımızdıń gúllep-jasnawı ushın xızmet etedi. Insan hám puqaralardıń huqıq hám erkinliklerin sáwlelendiriw, olarǵa ámel etiw, támiyinlew hám qorǵaw, olardı hár qanday nızamsız aralasıwǵa yaki sheklewlerden qorǵaw wazıypasın mámleketimiz óz wazıypasına alǵan.
Konferenciyada Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov, Qaraqalpaqstan Respublikası Ádillik ministri S. Mambetkadırov, Qaraqalpaqstan Respublikası sudı baslıǵınıń orınbasarı K.Tariyxovlar Qaraqalpaqstan Respublikası Konstituciyasınıń qabıl etilgenine 29 jıl tolıwı múnásibeti menen ótkerilip atırǵan ushırasıwdıń áhmiyeti hám Tiykarǵı nızamnıń mazmun-mánisin student jaslarımızǵa keń túrde túsindirdi. Konstituciyamızǵa kirgizilgen sońǵı ózgeris hám qosımshalar, olardıń áhmiyeti haqqında tolıq maǵlıwmatlar berdi.
Shıǵıp sóylewshiler jıynalǵanlardı Qaraqalpaqstan Respublikası Konstituciyasınıń qabıl etilgenine 29 jıl tolıwı bayramı menen qutlıqlap, mámleketimizde nızam ústinligin támiyinlew, jaslardıń huqıqıy sawatlılıǵı jáne mádeniyatın arttırıw baǵdarında ámelge asırılıp atırǵan jumıslar haqqında aytıp ótti.
Qaraqalpaq mámleketlik universiteti “Insan huqıqları, mámleketlik huqıq hám basqarıw” kafedrası assistenti D.Alniyazov, Qaraqalpaq mámleketlik universiteti 3-kurs studenti A. Ilyasovlar ózleriniń bayanatları menen qatnastı.
Qaraqalpaqstan Respublikası Konstituciyasınıń qabıl etilgenine 29 jıl tolıwına arnalǵan ushırasıw jaslarımızdıń huqıqıy mádeniyatın asırıwda úlken áhmiyetke iye bolǵan ilajdıń birine aylandı.
QMU Baspasóz xızmeti.
