15-апрель — «Мәденият ҳәм көркем-өнер хызметкерлери» күни байрамы.
Елимизде соӊғы жылда бул сәнени белгилеӯ жақсы дәстүрге айланып келмекте.
Өзбекстан Республикасы Президентиниӊ 2020-жыл 26-май сәнесиндеги «Мәденият ҳәм көркем өнер тараӯыныӊ кеӊ жәмийетшиликтеги орны ҳәм әҳмийетин еледе жетилистириӯ» бойынша тастыйықланған қарарына муӯапық ҳәр жылы 15-апрель сәнеси республикамызда «Мәденият ҳәм көркем-өнер хызметкерлери» күни сыпатында кеӊ түрде белгиленеди.
Усы сәне мүнәсибети менен бүгин, 15-апрель күни Бердақ атындағы Қарақалпақ мәмлекетлик университетинде «Мәденият ҳәм көркем-өнер хызметкерлери» күни салтанатлы жағдайда белгиленип өтилди.
Дәслеп Мәденият сарайыныӊ фоесинде университет студент жасларыныӊ көргизбелери қойылып, олар өзлериниӊ қол өнери мийнетлерин көпшиликтиӊ нәзерине усынды.
Илажда университет ректоры Ахмед Реймов сөзге шығып, байрам қатнасыӯшыларын «Мәденият ҳәм көркем-өнер хызметкерлери» күни менен қызғын қутлықлады. Соныӊ менен бирге университетимизде билим алып атырған талантлы жасларымыздыӊ мәденият ҳәм көркем өнер тараӯындағы жетискенликлерине тоқтап өтти.
Илажда шығып сөйлеӯшилердиӊ атап өткениндей, университеттиӊ Көркем өнер факультетинде оқып билим алып, бүгинги күнде Мәденият ҳәм кѳркем-ѳнер тараӯында жемисли мийнет етип атырған жаслардыӊ қатары барған сайын артып атыр. Олар өз нәӯбетинде усы тараӯдыӊ раӯажланыӯына өзлериниӊ мүнәсип үлесин қосып келмекте.
Университетимиздиӊ «Ҳүрлиман» халық ансамбили бүгинги күнде өз әтирапына еӊ талантлы ҳәм қәбилетли жасларды жәмлеп, олар мәмлекетимиз бойлап, сондай-ақ, шет еллерде де мәдений илажлар менен сапарларда болып қайтты.
Көркем өнер факультетинде оқып билим алып атырған талантлы студент жасларымыз республикамызда өткерилип атырған үлкен байрам салтанаты менен илажларда елимизге белгили көркем өнер шеберлери менен бирге қатнасыӯы да үлкен мақтаныш болып табылады. Бундай жетискенликтиӊ түп сағасы бул уллы дәргайда устазлардан өзлестирген билими менен үйренген өнери салмақлы орын ийелейди.
Илаж соӊында университетимиздиӊ талантлы ҳәм қәбилетли студент жасларыныӊ атқарыӯында байрам концерти қойып берилди.
Илаждан көринислер
