Berdaq atındaǵı Qaraqalpaq mámleketlik universiteti hám Turkiyanıń Ege universiteti menen xalıq aralıq birge islesiw boyınsha shártnamaǵa qol qoyısılǵan edi. Usı shártnama tiykarında Еge universiteti Túrkiya xalıqlar dúnyası institutı folklor bóliminiń docenti Pinar Fedakor hám Еge universiteti Ádebiyat fakulteti doktorantı Arzu Ajarlar 2022-jıl 13-28-may kúnleri aralıǵında universitetimizdegi qaraqalpaq filologiyası hám jurnalistika fakulteti student-jaslarına sabaq ótpekte.
Búgin olar Berdaq atındaǵı Qaraqalpaq mámleketlik universitetiniń rektorı A.Reymov penen ushırastı. Ushırasıwda universitet rektorı qániygeliklerde bilim alıp atırǵan magistrantlar menen doktorantlar da ilimiy-izertlew jumısların Túrkiy xalıqlar dúniyası institut alımları menen birgelikte dawam ettiriw hám eki universitet arasında tájiriybe almasıw bunnan bılayda jetilistiriw máselesin usınıs etti. Sonday-aq, Еge universiteti Túrkiy xalıqlar dúnyası institutı folklor bóliminiń docenti Pinar Fedakor óz sózinde universitetimizge kelgeninen, student jaslarǵa bilim berip atırǵanlıǵınan quwanıshlı ekenin, sonıń menen bir qatarda, Еge universiteti Túrkiy xalıqlar dúnyası institutında qaraqalpaq ádebiyatı menen folklorı da belgili ilimpazlar tárepinen izertlenip atırǵanlıǵın atap ótti.
QMU Baspasóz xızmeti
