Berdaq atındaǵı Qaraqalpaq mámleketlik universitetiniń 45 jıllıǵı múnásibeti menen búgin Qaraqalpaq mámleketlik universiteti mádeniyat sarayında «Qaraqalpaqstan regionında joqarı bilim hám ilim-pán rawajlanıwında Qaraqalpaq mámleketlik universitetiniń ornı: keshe, búgin, keleshekte» atamasındaǵı xalıq aralıq ilimiy-ámeliy konferenciyası hám Qaraqalpaq mámleketlik universitetiniń 45 jıllıq yubeleyine baǵıshlanǵan teatrlastırılǵan hám ádebiy muzıkalı xoreografiyalıq bayram tamashası bolıp ótti.
Oǵan Qaraqalpaqstan Respublikası Joqarǵı Keńesiniń Baslıǵı M.Kamalov, Qaraqalpaqstan Respublikası Ministrler Keńesi baslıǵı Q.Sariyev hám sırt ellerdegi abıroylı joqarı oqıw orınlarınan miymanlar qatnastı. Eń dáslep Berdaq atındaǵı Qaraqalpaq mámleketlik universiteti rektorı A.Reymov miymanlardı kútip alıp, universitet tariyxına baylanıslı kórgizbeler menen tanıstırıp ótti.
Bunnan soń «Qaraqalpaqstan regionında joqarı bilim hám ilim-pán rawajlanıwında Qaraqalpaq mámleketlik universitetiniń ornı: keshe, búgin, keleshekte» atamasındaǵı xalıq aralıq ilimiy-ámeliy konferenciya óz jumısın basladı. Konferenciyanda Qaraqalpaqstan Respublikası Joqarǵı Kenesi Baslıǵı M.Kamalov sózge shıǵıp, búgingi Qaraqalpaq mámleketlik universitetiniń 45 jıllıq yubeleyi menen qızǵın qutlıqladı.
Sonday-aq, konferenciyada Berdaq atındaǵı Qaraqalpaq mámleketlik universitetiniń rektorı A.Reymov bayanat jasadı. Ol óz bayanatında universitetimizdiń búgingidey zamanagóy kelbetine, qolǵa kirgizip atırǵan tabıslarına maqtanısh hám shúkirlik tuyǵısı menen birge usı jetiskenliklerdiń dereklerine, bilim dárgayınıń basıp ótken tariyxıy jolına názer taslap, onı shólkemlestiriw hám ayaqqa turǵızıwdaǵı mashaqatlı miynetlerdi, tınımsız izlenislerdi hám usı dárgayǵa miyneti sińgen insanlardıń ullı xızmetlerin atap ótti.
Sonın menen birqatarda konfernciyada sırt ellerdegi abıroylı joqarı oqıw orınlarınan Kuznecova Elena Timofeevna – Polessk mámleketlik universiteti, Kasenov Erlan – Abay atındaǵı Qazaq milliy pedagogika universiteti, Al Maqtari Rashid Abdulsalam Abdullax – Malayziyanıń Linkoln Kolleg universiteti hám basqada JOOlarınan kelgen miymanlar sózge shıǵıp, búgingi Qaraqalpaq mámleketlik universitetiniń 45 jıllıq yubeleyi menen qutlıqladı.
Konferencya qatnasıwshılarınıń qutlıqlawları hám ilimiy bayanatları juwmaqlanǵannan soń Qaraqalpaq mámleketlik universitetiniń 45 jıllıq yubeleyine baǵıshlanǵan koncert baǵdarlaması menen dawam etti.
QMU Baspasóz xızmeti
