“Yuksak Saloxiyat” jámiyetlik shólkemi Qaraqalpaqstan filialı hám birge islesiwshi jergilikli shólkemler tárepinen Qaraózek rayonı Kórimli awılı turǵınlarınıń taza (duzsız) ishimlik suwı menen támiyinlew maqsetinde aymaqtaǵı suw dereklerin úyreniw jumısları alıp barılıp, joybar tayarlandı. Kanada fondınıń qarjılandırıwındaǵı bul joybar boyınsha usı jıldın yanvar-mart aylarında aymaqda jumıs alıp barıldı.

Joybar eki basqıshda: aymaq turǵınları menen tusindiriw jumısları hám qurılıs jumısların alıp barıw menen ámelge asırıldı. Birinshi basqıshda, 200 den aslam aymaq turǵınları menen taza ishimlik suwınıń insan salamatlıǵına unamlı tásiri, turǵınlardıń aymaqtaǵı paydalanıp atırǵan suw dereklerinde laboratoriyalıq tekseriwler natiyjesinde anıqlanǵan duzlar hám ornatılatuǵın suwdı duzsızlandırıwshı úskeneden padalanıw qániyge shıpakerleri járdeminde túsindirildi. Joybar boyınsha tayarlanǵan «suw hám sanitariya» atamasında tarqatpa materiallar bukletler járdeminde ugit násiyatlaw jumısları alıp barıldı.

Ekinshi basqıshda bolsa, Kanada fondı hám BMShniń «Bar bolǵan nasos stanciyasında suw tazalaw úskenelerin ornatıw arqalı Ózbekstandaǵı Aralboyınıń qurǵaq zonasında taza ishimlik suwınan paydalanıwdı jaqsılaw» joybarı tiykarında suwdı duzsızlandırıwshı úskene oranatıw boyınsha jumıs alıp barıldı. Natiyjede, 80 nen aslam shańaraq tazalanǵan ishimlik suwı menen támiyinlewge erisildi. Sonıń menen birge, bul uskeneden durıs paydalanıw boyınsha aymaqta jasawshı qániyge ajıratıp, turaqlı jumıs penen támiyinlendi.

Raxmetova Gulmira