Aldın xabar bergenimizdey Berdaq atındaǵı Qaraqalpaq mámleketlik universiteti tárepinen 2022/2023 oqıw jılı ushın usı jıldıń 1-5-avgust kúnleri aralıǵında kásiplik (dóretiwshilik) imtixanlarınıń ótkeriliwi boyınsha keste tastıyıqlanǵan edi. Usı kestege muwapıq búgin kásiplik (dóretiwshilik) imtixanlarınıń juwmaqlawshı kúni bolıp, bul kásiplik (dóretiwshilik) imtixanlarına jámi 1053 abiturient hújjet tapsırǵan. Búgin erte tańnan  Sport iskerligi (futbol, gúres) hám Ámeliy kórkem óner talim baǵdarlarına kásiplik (dóretiwshilik) imtixanları ótkerilip, talabanlar óz qábiletlerin sınaqtan ótkermekte. 

Imtixanlardıń nızam talaplarına say ádil hám ashıq-aydınlıq penen ótkeriliwin kózden ótkeriw maqsetinde bugin Berdaq atındaǵı Qaraqalpaq mámleketlik universitetine Qaraqalapaqstan Respublikası Joqarǵı Keńesi komitet baslıqları, Joqarǵı Keńesiniń deputatları hám Korrupciyaǵa qarsı gúresiw aymaqlıq keńesiniń bir qatar wákilleri menen birgelikte ótkerilip atırılǵan imtixanlardıń barısı menen tanıstı.

Sonday-aq, miymanlar imtixan tapsırıp atırǵan abiturientler hám olardıń ata-anaları menen imtixan ótkeriletuǵın orınlarda jaratılǵan shárayatlar haqqında sáwbetlesip, abiturientler hám olardıń ata-anaları bul jerdegi qolaylıqlar hám abiturienlerdiń toplaǵan balları sol waqıttıń ózinde málim etilip atırǵanlıǵı,  sonıń menen bir qatarda imtixan processin internet arqalı tikkeley onlayn rejimde baqlap barıw imkaniyatı bar ekenliginen shólkemlestiriwshilerge óz minnetdarshılıǵın bildirdi. Haqıyqatında da ádil hám ashıq-aydınlıq tárizde ótkerilip atırǵan imtixanlar haqıyqıy óz bilimi hám sporttaǵı joqarı sheberligi bar jaslar ushın jáne bir jaqsı imkaniyat bolıp tabıladı.

QMU Baspasóz xızmeti