Húrmetli Prezidentimiz aytqanınday rawajlanıwdıń tiykarǵı irge tası da, mámleketti qúdiretli etetuǵın, milletti ullı etetuǵın kúsh bul, ilim, tálim hám tárbiya bolıp tabıladı degen edi. Sonlıqtan búgin Berdaq atındaǵı Qaraqalpaq mámleketlik universitetinde 2022-2023 taza oqıw jılı ushın tiykarǵı wazıypalardı belgilep alıw hám tálim-tárbiya sapasın jaqsılawǵa baǵıshlanǵan májilis bolıp ótti. Májiliste Prorektorlar hám barlıq fakultet tyutorları qatnastı. Májilisti Berdaq atındaǵı Qaraqalpaq mámleketlik universiteti rektorı A.Reymov ashıp berdi hám alıp bardı. Dáslep ol óz sózinde búgingi kúnde Mámleketimiz tárepinen bilimlendiriw sistemasında alıp barılıp atırǵan jumıslar, mámleketimizde ámelge asırılıp atırılǵan reformalar, jaslarımızǵa berilip atırılǵan imkaniyatlardı student-jaslarımız arasında keń túrde úgit-násiyatlaw, olardıń tálim-tárbiyasına, keleshekte mámleketimizdiń rawajlanıwına úles qosatuǵın jetik kadrlar bolıp jetilisiwinde hámme teńdey juwapker ekenligin aytıp ótti.
Bunnan soń, sózge shıqqanlar 2021/2022 oqıw jılında tyutorlardıń studenler menen islesiwi qanaatlandırarsız ekenligi, bunday jaǵdaylardı boldırmaw maqsetinde, aldaǵı waqıtları studentler menen hám olardıń ata-anaları menen tıǵız baylanıs ornatıp, jataqxanalarda hám ijarda turatuǵın studentlerden turaqlı ráwishte xabar alıp turıw kerek ekenligin aytıp ótti. Sonıń menen bir qatarda májiliste universitetimizdiń jaslar máseleleri boyınsha prorektorı S.Alauatdinov sózge shıǵıp, 2021-2022 oqıw jılında islengen jumıslardıń juwmaǵı hám 2022/2023 oqıw jılı ushın tiykarǵı wazıypalar belgilep alıw boyınsha toqtalıp ótti.
Sonda-aq, studentlerdiń tálim-tárbiyası menen shuǵullanıw, social tarmaqlardaǵı hár qıylı tastıyıqlanbaǵan, jalǵan xabarlardı keń jámiyetshilikke tarqatpaw, 2022/2023 taza oqıw jılına tayarlıq kóriw haqqında barlıq fakultet tyutorlarına tapsırmalar berildi.
QMU Baspasóz xızmeti
