Búgin Berdaq atındaǵı Qaraqalpaq mámleketlik universitetine 1-kursqa qabıllanǵan studentlerge gúwalıq tapsırıw máresimi bolıp ótti. Ilajǵa universitet professor-oqıtıwshılar, fakultet dekanları, student-jaslar, olardıń ata-anaları hám ǵalaba xabar quralları wákilleri qatnastı. Dáslep ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajda universitet rektorı A.Reymov sózge shıǵıp, 2022/2023 oqıw jılında Berdaq atındaǵı Qaraqalpaq mámleketlik universitetine oqıwǵa qabıllanıp, student bolıw baxıtına miyassar bolǵan student-jaslardı hám olardıń ata-anaların qutlıqlap, Húrmetli Prezidentimizdiń mámleketimizde bilimlendiriw tarawına bolǵan ayrıqsha itibarın, sonday-aq, student-jaslardıń joqarı bilim alıwları ushın kórsetken ǵamxorlıǵı, xalıqshıl siyasatı nátiyjesinde 2022/2023 oqıw jılı ushın barlıq baǵdarlar boyınsha tólemli-kontrakt muǵdarları asırılmaytuǵınlıǵı, jámiyetimizde oqıp bilim alaman degen jaslarǵa keń múmkinshilikler jaratılıp berilip atırılǵanlıǵın aytıp, usınday imkaniyatlardan aqılǵa muwapıq paydalanıp, aldaǵı waqıtları oqıp, tereń bilim alıp, Watanımızdıń rawajlanıwı, jolında ayanbay xızmet etiwde tabıslar tiledi.
Bunnan soń, professor-oqıtıwshılar, studentlerdiń ata-anaları sózge shıǵıp, universitetke oqıwǵa qabıl etilgen studentlerdi búgingi quwanıshlı kúni menen qutlıqlap, aldaǵı oqıwlarında tabıslar tiledi.
Sonıń menen bir qatarda joqarı ball toplaǵan student-jaslar sózge shıǵıp, búgingi kúnde mámleketimiz tárepinen jaslarǵa berilip atırılǵan imkaniyatlardan sheksiz quwanıshta ekenin aytıp, usınday imkaniyatlardı jaratıp berip atırǵan Húrmetli Prezidentimizge óz minnetdarshılıqların bildirdi.
Ilajda joqarı ball toplaplaǵan student-jaslarǵa studentlik gúwalıqları tapsırılıdı hám universitet jámááti tárepinen tayarlanǵan koncert baǵdarlaması menen dawam etti.
Maǵlıwmat ushın 2022/2023 oqıw jılında Berdaq atındaǵı Qaraqalpaq mámleketlik universitetiniń bakalavriatınıń kúndizgi, sırtqı hám keshki tálim baǵdarların birinshi belgilep, dizimnen ótken abiturientler 25 mıńnan aslamdı quraǵan bolsa, sonnan 5046 abiturient studentler qatarına qabıl etildi.
QMU baspasóz xızmeti
